بنات البلاد

[اماراتيه كووول]

مسا الخير ...


بغيت اناقشكم في موضوع محيرني واشووفه منتشر بين بنات البلاد (مب الكل البعض ) وهو الزواج من الاجانب ... شي فعلا غريب ويخليني اسأل وين شباب البلاد .. هذا اللي متزوج الفلبينيه ولا المصريه ولا غيرها وغيرها وينهم ليش يخلوون بنات بلادهم بقبضة المصري ولا السوري ولا حتى الهندي .. مع احترامي لجميع الجنسيات يا اخواني بس حلات الثوب رقعته منه وفيه ..


يعني من فتره ناقشتني ربيعتيه انها تفكر تتزوج من مصري .. هي الله يستر عليها مطلقه وما عندها عيال والله ما كتب لها النصيب مره ثانيه .. بس حبت مصري وتبغي تتزوجه وقدمت بأوراقها للديوان ...!!!!!!!!!!! انا انصعقت ليش يا فلانه وشمعني واستهدي بالله بس الصراحه هي مصممه وعرفت بعدها ان طلبها انرفض ...


انا والله مب في خاطري شي على اي جنسيه عربيه او اسيويه بس يا ناس شو بيكون مستقبل اليهال والعيال اللي بيووون حد فكر فيهم هذي اللي بتتزوج هندي (وحصلت ) ولا باكستاني ولا غيره ولا غيره ولا حتى سوري او لبناني الشي اللي اريد اعرفه شو بيكون مصير عيالهم في المستقبل بتعيش وياهم في الامارات ولا بتسير بلاد زوجها ... واذا عاشت هني شو بتكون نظرة المجتمع لها ولعيالها ..


وكل وحده من هذيلا البنات الله يهديهن ماسكات حديثين للرسول (صلى الله عليه وسلم)
1- إن جاءكم من ترضون دينه وخلقه فزوجوه
2- لا فرق لاعجمي على عربي الا بالتقوى


يا بنات الحلال صح ان هذا كلام الرسوم (صلى الله عليه وسلم) بس مب هذا المقصوود منه بس كأنك تصرخ بليا فايده لانهن مقتنعات ان مقصد الرسول حالاتهن اللي صايره ...


سمحلو لي طولت عليكم بس فعلا نحن بحاجه لحل سريع وفعال مب بس كلام للنقاش
انا عن نفسي لا ارضى على نفسي ولا على اختي ولا اي حد من هلي (لو شاورووني ) انه يصير له ها الشي ...
وتقبلوا مني كل احترام


اختكم ....
أنا

[المـــــ دلوعة ـــــزاريع]

مشكورة اماراتيه كووول
صدقتي
ليش ناخذ من اللي من غير ثوبنا
يعني فلت رياييل في البلاد

[اماراتيه كووول]

أشكرج يالغلا على المرور ولا تحرمينا من ردودج

[ملكة الحور]

السلام عليكم

مشكوره اماراتيه كوول على الموضوع الحساس ..

انا من رايي ان هناك عدة اسباب ,,

واتمنى من الشباب انهم يناقشونا في هذا الموضوع

حتى نعرف منهم الاسباب من وجه نظرهم

اولا : الشباب مش متعود على المسؤليه

من بيت وعيال , إذا انجبر وتزوج , يخليها بيت اهله وهم يصرفون عليها ويربون عياله

وحضرته لاهي في الاسواق والمراكز والسهر وبعضهم في الرجاب .

والشاب العزوبي تلقاه وصل عمره فوق 25 ولا تزوج ,, وراتبه كله على السياره والبنوك وغيرها ,,

ويوم يقولوله اهله( بنزوجك ) لاحظوا كلمة بنزوجك ,, يعني هوه ما بيخسر شئ من جيبه

يقولهم لا ؟ بعدني ما ريد عرس الحين ........ومن هالاعذار الي مالها داعي ,,

وبعضهم مش الكل .. البعض مكتفي عن الزواج عنده من الصديقات الي ساداتنه عن الزواج الحلال ,,

والدوله ما قصرت فيهم خفضت من تكاليف الزواج . وساعدتهم في الزواجات الجماعيه .

وصندوق الزواج ووفرت قاعات الاعراس المجانيه .........

شو رايكم يا شباب ...

دافعوا عن عماركم !!

[غرشة عسل]

قسمة و نصيب !!

[فوع الزعفران]

هالايام الشاب يهتم بعمره وبس ولا يهمه حد غير (( اللهم نفسي )) فالزواج في هالوقت صار على شور الاهل طبعا عند بعض الشباب مب كلهم بس ليش ما يتحكم هذا الشاب بتصرفاته وتكون عنده السلطة في اختيار شريكه حياته المناسبه وقبل لا يقرر ياخذها يفكر ويرسم خريطه عقليه مبسطه ويتأملها هل هذي الزوجة المناسبه بالفعل أم لا؟!! واذا كانت الزوجة وافدة ايضا يجب التفكير مليون مره لأن حياته سوف تتغير مليون بالمئة ...