رمضان الهير

[راعيها]

السلام عليكم ورحمة الله وبركاته

يطل علينا شهر رمضان المبارك شهر الرحمة والخير

تعودنا منذ الصغر أن نشاهد عادات مرتبطة بالشهر الفضيل لكنها تلاشت على مر السنين

في السابق كان المواطنين يفطرون معاً في خيمة تقام بجانب المساجد او في بيت أحدهم والنساء يلتقين ببعض بعد صلاة التراويح اما الشباب فكانت تجمعهم هوايات عديدة مثل الدورات الرمضانية في الحواري او النادي .. اما الأن فكل هذه العادات تغيرت

كل واحد يخبرنا عن عادات رمضان إلي يذكرها وشو إلي تغير عن قبل

[الظبي]

وعليكم السلام رحمة الله وبركاته....

على ما اذكر كان رمضان بالفعل أحلى من الآن له عادات جميلة مرتبطة بالماضي العريق وبمنزلنا القديم..

كنا في الماضي نفطر مع حريم يرانا ورياييل بيتنا في بيت يرانا...... وكنا نسير البنات وربايعنا صوب المسيد

نصلي التراويح ..... وعقب انرد ونيلس انسولف ونهبش من الموجود...

أما الحين من كبرنا حتى ما انعرف شو اختلف على حال يرانا من القطاعة اللي صارت بين الناس..

الله المستعان من القادم.......


هذا كلما تحوي جعبتي عن أيام ليتها ترجع كان اختلف الحال.......

[راعيها]

نعم كلنا نتمنى ترد ذيك الايام بس لي فات مات وليتنا نحاول بأنفسنا نرد ولو شي بسيط من الماضي الجميل

مشكورة على ردج

[بنت العزبة]

لين الحين الحمدلله نلتم نحن كلنا الحريم في بيت ونفطر رباعه . .


مشكوور اخويه على الطرح

\وماقصرت


والله يعطيك الصحه والعافيه ..

[الرحال]

شكرا راعيها فتحت لنا هالباب, لمعرفة رمضان الماضي ورمضان الحاضر

ما ننسى سوالف الشباب وتجمعاتهم وخاصه عقب صلاه التراويح في الهير اذكر كان ملاعب الطايرة ما شاء الله متوفره فيها في كل حارة تلقى ملعب وخصم جديد ولي يركب الشبك والكشافات ويرش الرمله ماء

حد يلعب وحد يطمش ودشت امور كثيره منها الخيمه عدال المعلب وحضيره الضو والبلاي ستيشن والفواله لي مخلص نصها ونصها بهارها من التراب وكل من اليوع انته

ولي يمشي من حاره لحاره للمفاوضه على جدول المباريات بين الشباب ( ايام ملعب الطايره صوب المزارع)

وغيره الكثير

ولا الحين زين يوم تفطر وتحصل حد يرمسك وله بارض
الرحال

[آه يا من روحه اعتلت]

افتقدت ملعب الطايره اللي كان عدال بيتنا و اصوات الشباب اللي كانت اتشل الدنيا


افتقدت صوت التقحيص بالدراجات قبل السحور ولو انه كان مزعج في بعض الاحيان و العيوز تدعي عليهم ليل نهار



افتقدت لمة الشواب على الفطور و مهازبهم على اللي يسوا و اللي ما يسوا


افتقدت اليلسه و الفطور في نص الدوره و تجمع خلق الله ما خلق حتى البتان لول تفطر ويانا


افتقدت الزماط على الفواله بين البيوت و اللي اتسوي من الحرمات "احسن خنفروش"



و ((((((أكثر))))) شي افتقدته القلوب الطيبه و النفوس اللي على نياتها اللي استوينا ما نشوف الا تمثيل و سب حتى لو في نهار رمضان!!!


و مشكور يا راعيها على الموضوع الفنان

[الكتبيه]

لين الحين الحمدلله نلتم نحن كلنا الحريم في بيت ونفطر رباعه

[راعيها]

مرحبا الساع

حي الله خواني وخواتي الاعضاء

الموضوع يثير مشاعرنا وذكرياتنا والحقيقة يوم اقارن بين رمضان الحينه وبين رمضان قبل تضربني غصه واشتاق لذيك الايام لانها حلوه بكل مافيها

ياليت شي من الماضي يعود عشان نحس بفضل الشهر الكريم ونحس بقيمة عاداتنا وتقاليدنا واللمه الطيبه

مشكورين على تفاعلكم وسردكم لشي من رمضان اول

الرحال ويامن روحه اعتلت ...

صدق شوقتوني لايام قبل محلاها من ايام

علوم كانت تستوي وكل إلي قلتوه خطفنا عليه

[اماراتي يلين الموت]

شكرا على الموضوع والله يزيك خير