القماط

[الرحال]

السلام عليكم ورحمة الله وبركاته

بدون نقاط المقدمة ابدأ في الموضوع

في احدى قاعات الدراسة لفت انتباهي البروفيسور طبعا اجنبي وكان الموضوع عن اسباب تزايد اعداد الاطفال حديثي الولادة بالوفاة والحكم عند الله

ولكن بالتآكيد هناك اسباب من آهمال وغيره, وذكر فجآة الشرق الاوسط قلت اكيد بيبدأ بالحش فينا الحين

المهم, قال الآمهات في الشرق الاوسط اغلبهن يقومن بتقميط الياهل ( لفه بقطعه من القماش واحكام ربطها عليه)

المهم , قلت انا هذا شدراه بنا , وبعد تفكير قليلا لو نلاحظ هالايام الآمهات كلهن المتعلمات وغيرهن يتبعن نفس الطريقة والمستغرب منه يحكمن الربط عليه بحجة ان ينام الطفل ولا يآلم نفسه بيديه هذا السائد عندنا

ولكن لو الحين حد منا لفو عليه هالقماش الحين شرات ماكان ياهل ماظني يحتمل 5 دقايق عيل كيف الياهل مسكين بالساعات واعتقد مرات يوم كامل يتم بهذا الوضع

سؤالي هو

لماذا الطفل عندنا يلفونه ويقمطونه ؟ وهل حد فكر يمكن هالشي يسبب له الوفاه بكتمان النفس عنه؟


اتمنى تفاعلكم

شكرا

الرحال

[سديم]

احيد الامهات ايقمطون الياهل عشان يصطلب ....ويقولون امهاتنا عشان ما يتخرع ....

بس احسه مب ضيق عليهم وايد عشان يكتم نفسهم ويموتون ....

تسلم ع الطرح ......

[الولايات المتحده البدويه]

عليكم السلام والرحمهـ


الصراحه الي اعرفه انه القماط له علاقه بعضلات اليدين والريول ويساعدهم عن ايرحون عمارهم بظفورهم...

ومادري بعد له علاقه بصياح الياهل من يقمطونه يخف بصياحه


وتسلم ع الطرح

[محينه]

هلا بهالموضوع الغريب

لماذا الطفل عندنا يلفونه ويقمطونه ؟ وهل حد فكر يمكن هالشي يسبب له الوفاه بكتمان النفس عنه؟

حسب الي اعرفه

انه يوم يلفون الياهل اذا حد خوفه وفز مايوقف قلبه.يعني يكون شاد عليه شوي

وعشان مايشمخ عمره

وعشان يعدله ويعدل عظام ريوله وايديه

والقماط مايسبب وفاة الطفل..لانه مايشدونه وايد

وقول لدكتوركم ماله خص فينا لايتكلم عن الشرق الاوسط

[دهن عود]

القماط زين حق الاطفال ... الامهات يقولن ان الطفل شرات العينيه يوم يطيح ... عاد الام هي اللي تشكله وبالقماط يعتدلن ريوله ما يطلعن مقوسات ... وبعد يوم حد يزيغه ما يفز ...

انا اذكر واحد من اليهال في عيالتنا ما كان يرقد الا بقماط وممجن بعد ... اذا كان مرتخي يتم صياحه شال الدنيا ..

حلوين وهم مقمطين

تحياتي لك

[اللحظة الأخيرة]

السلام عليكم

طرح غريب نوعاً ما ..^^

من وجهة نظري .. أن جميعها معتقدات لا صحة لها

لو ننظر إلى أطفالهم لوجدانهم نفس مستوى أطفالنا بل و أفضل
بالرغم من أنهم لا يستخدمون أشياء مثل هذه

يعني .. أتوقع أنه من معتقداتهم التي لا تحصى

[الرحال]

مرحبا

ارآء مختلفة جدا بين كل عضو والاخر وافكار اول مره نسمعها

ارغب في معرفة المزيد

شكرا لكم

الرحال

[الـلاّل]

السلام عليكم

لو القماط يموت جان نص عيال فريجنا راحوا فيها ههههههههههههههه

اللي اعرفه انه زين للياهل مثل ما قالوا الاخوان خاصة من ناحية العضلات و تسوية العظام هذا اللي اسمعه دايم من شوابنا ..

في الاخير ترى معتقدات الاولين فيها من الصحة الكثير وتكون قريبة من السنة النبويه لكن الصياغه تختلف ..

طرح جميل ..احترامي..

الـلاّل

[الغلا كله حقي]

السلام عليكم ورحمة الله وبركاته
اممممم
لا القماط شي زين
لانه يمنع الطفل انه يجرح نفسه وبعدين ما يرصونها واايد
يعني شوي يخلون مدخل للهواء
^^
هذا والله اعلم

[أم خالد]

السلام عليكم ورحمة الله وبركاة
تسلم الرحال ع المضوع
أعتقد ان الغرب ينتقدون العرب في كل شيئ
حتى في عاداتنا
امهاتنا وجداتنا على حق في كل صغيرة وكبيره
كل يوم نكتشف ان افعالهم و اقوالهم هي الصح
وما علينا من كلام الغرب
القماط مفيد للاطفال

[بطرانـﮧ]

وعليكم السلام ورحمة الله وبركاته


القماط شي زين للياهل وله فوايد وايد ومثل ماقالت اختي اللال لو يموت جان نص عيال الدوله نافدين

اهم فوايده يصلب العظام ويشد ع الياهل مايكون رخو .. ههههههه يعني قابظ ع عمره ومصطلب

وفوايده ع العضلات وانه مايخليهم يشمخون عمارهم ولا يفزون من الرقاد مثل ماقالن خواتيه

بس اللي يضر يوم يشدونه وايد او انه يتم طول اليوم ع الياهل>> هنيه صدق بيروح فيها لوولز

ممممممم موضوع حلو ومميز وتسلم على هالموضوع النايصو


بطرانه

[رووح غاليها]

مرحباا

أنا أشوف أنه القماط للياهل واايد زين .... و أنا أسمع من شوابنا انه القماط يصلب الياهل و يساعده علي تقويه عظام الرويل و الأيدين بما نه يااهل و عظامه بعدهن ما أكتمل نموهن ...

و علي فكره الأمهات مستحيل يشدون القماط علي عيالهم بالقوه ... يعني أكيد ما بيختنقون منه ...