••¤(`×[¤:: أول حزواة في الهير .كوم ..مع الغافري بوطحنون:: ¤]×´)¤••

[الغافري بوطحنون]

مرحبا بكم يا بعد عيني يا هلا بسيد حبايبها
ياهنايه وبسمة سنيني عد ما هبت هبايبها..!
شوفتكم ورضاكم يكفيني نحسب الخطوة ونرقبها
تاه وردي في بساتيني ينتظر روياكم و أطيبها..!
والقوافي والتلاحيني تحتفل و أهديكم اعذبها
مصدر الهامي وتعنيني والقصايد فيكم نكتبها..!
●
●
●
.+[+ أعضاء منتديات الهيــرالغاليين+]+.
مساكم الله بالخير ..!
●
●
●
أقدم اليوم الحزواة الاولى .. وأتمنى انها تنال على رضاكم ..
.
.
.
●
●
●

حزواة اليوم بـعنوان .. !!
![ بيـــــاع الحكـــــم ]!


اليوم بخبركم عن ريال فقير وبيقرر أنه ينتقل من منطقته عسب يدور له شغل يكسب منه بيزات أحسن عن قريته ..
فـ الحزواة بذكر لكم أسامي مناطق من دولتنا يمكن تعرفونها بس اللي مب من الامارات شوي بيصعب عليهم يعرفون المسافة بالمناطق
وقررت أني أذكر هالمناطق عسب الريال فقير وحالته المادية ظعيفة ومنطقته ما فيها خدمات شرا اللي موجودة فالبلاد والساحل..

المناطق اللي بذكرها

( الحويلات _ حتــا _ المدام _ البداير _ وصولاً لـ دبي )

أخترت مناطق سهلة مع ان التشبيه بالمناطق الأصلية للحزواة أفضل..بس عرفت أنه بيكون صعب عليكم



يقولكم

ريال عايش ويا هله وحرمته فـ منطقة يسمونها الحويلات .. عـ أيام شوّابنا كانت القرى فقيرة أكثر من الحينه .. المهم .. الريال قرر أنه يسافر ويخلي هله ويسير يدور له شغلة زينة .. خبر هله عن هالقرار .. لو انه حرمته اعترضت لانه توهم متزوجين ..
وتعرفون قبل السفر عـ أيام يدودنا واهلنا السفر للشغل يكون بالسنين.. الريال قنع هله بسفره .. وظهر عنهم .. يدور منطقة احسن من منطقته عسب يداوم فيها .. تم يمشي ويمشي من الحويلات لين قولو انتو وصل حتــا جي .. شاف التطور والله انه ..هب لين هناك..قال هنيه صدق البيزات بتكون اكثر لكن انا بتم أمشي بعدني جاد احصل مكان أحسن ومطور أكثر .. كمل الريال سيره يا لين وصل شرا المدام .. شاف والله التطور زين عندهم ..تم يفكر يكمل ولا يشتغل فالمدام ......!!

صدق هنيه الدنيا مطورة أكثر لكن أنا بكمل سيري دام وصلت المدام ما تم شي عن دبي .. يمدحونها دبي .. كمل الريال سيره يالين وصل دبي .. وصل المغرب.. قال فخاطره أنا هنيه بشتغل ان شاء الله .. صلّى فالمسيد .. و من خلصو الصلاة سلمو عليه العرب..لانه الغريب قبل معروف اذا ما يكون من هل المنطقة..سلمو عليه وقربو به .. وكل واحد يحلف انه يستضيفه عنده..يا لين ياه واحد وقاله ما تبات الا عندي..وتعرفون ضيافة الضيف 3 أيام.. قضى ربيعنا الـ 3 أيام عند هالريال الطيب وأشهد انه كريم .. فاليوم الثالث قاله آمرنا شو نقدر نساعدك..شو محتاي .. ؟؟

قاله ربيعنا .. والله يا خويه انا ياي من منطقة بعيدة يسمونها الحويلات جان تعرفها...عقب طفت عـ حتــا وانت ياي من دبي .. وعييت أحصل لي شغل فـ مكان زين وراتب يسدني أنا وهلي وحرمتي ..

قاله الريال .. أبشر شغلك عندي أمرة .. أنا عندي حلال الحمدلله .. من الرجاب والهوش وكل الدبش امرة .. وأبا حد يشوف لي أشغالي وجان لك خبرة وعلم بالرجاب بتشتغل عندي..

قاله ربيعنا .. نعم عندي خبرة .. وجانك بتشغلني يزاك الله خير

قاله الريال .. تم امرة.. ومن تخلص أول 5 سنين لك اللي تباه وجانك بتكمل عقب الـ 5 سنين زين... وجانك بترد لهلك أنا ما بردك ..و انته اروحك بتربي الرجاب وبتشوف الزين والشين منهن...لك اللي تباها وتتخيرها من هالنوق ..

والله ربيعنا أشتغل أول 5 سنين .. وقاله الريال تخير لك من هالنوق اللي تباها وتراها من حقك وعن شغلك اللي اشتغلته .. شو الحينه بتكمل الشغل عندي ولا تولهت عـ هلك..؟

قاله والله أشوفني بعدني بشتغل 5 سنين .. كمل الريال 10 سنين وخذ ناقتين..وبعد كمل 5 سنين عقبهن..استون 15 سنة وخذ له 3 نوق ..

عقب الـ 15 سنة قاله الريال شو قررت بتشتغل عندي بعدك 5 سنين ولا ...؟

رد عليه ربيعنا لا والله يا عمي ..أشوفني اتولهت عـ الأهل وبسني من الشغل والغربة ..والحمدلله الخير وايد وأنت ما قصرت ويايه.. أشهد أنك عديتني واحد من عيالك

رد عليه الريال .. والله أنت كنت مساعدني وماظني احصل حد مثلك أمين في شغله وتعودت عليك.. لكن الله يوفقك ان شاء الله
●
●
●
يتبع
●
●
●

[الغافري بوطحنون]

ظهر ربيعنا وتم يمشي ووياه الـ 3 نوق اللي خذهن عن تعبه وشغله طول الـ 15 سنة ..

يمشي ويمشي وعـ المغيربان جيه وصل البداير .. و شاف عرقوب و ريال يالس موري الظو ..

السلاااام عليكم
وعليكم السلام والرحمة
أقرب أقرب .. عشاك عندي والله ما تسير قبل ما تتعشى ..

سار ربيعنا وسلم عـ الريال وتعشى عنده..
يوم تخبره قاله أنته
ريال شيبة وما عندك حد يشتغل لك وأشوفك أنته بعد جنك ما تشتغل ..جي يالس هنيه اروحك وشو تشوي !

رد عليه الريال قاله والله انا " بياع حكم " ..!!

قاله ربيعنا بياع حكم .؟ يعني هذي شغلتك اللي عايش منها ,.؟!!

قاله هي نعم أبيع حكم .. وجانك تباني اعطيك حكمة بيعني ناقة من هالنوق ..

الفضول لعب دوره عند ربيعنا .. قاله عطني اول حكمة وتراني بعتك هالناقة مقابل الحكمة ..

قاله بياع الحكم ..
الحكمة الأولى تقول :_


![ لا تــامن للسيل اذا شفت نجمـــة سهيــل ]!
يعني اذا شفت نجمة سهيل واضحة امرة لا تقول والله النجمة واضحة والجو مافيه غيوم والسيل الليلة ما بيي .. لا ترقد فـ وادي .. دوم خلك عـ الحزوم والسيوح ...

قاله ربيعنا انزين هالحكمة الاولى..امممم بعدك عطني حكمة ثانية ..

قاله بياع الحكم بعطيك..وشرا ما اتفقنا كل حكمة بـ ناقة..قاله فالك طيب وبعتك الناقة الثانية .. يالله عطني الحكمة الثانية..

قاله بياع الحكم ..
الحكمة الثانية تقول :_

![ لا تــامن للي عيونه صلق وظروســـه فــــرق ]!
قاله اللي تشوف عيونه يتصالقن تراه مبيت لك النية وما يقصد لك الخير .. وتشوف ظروسه فرق ..امرة مول لا تامن له..تحذر منه
قاله ربيعنا .. سلمت عـ الحكمة ولو اني أعرفها لكن ما عليه أنا بعتك الناقة وما شي رجعه احينه فـ الرمسة
أقولك شي .. عطني الحكمة الثالثة .. وتراني بعتك الناقة الثالثة بعد..


قاله بياع الحكم ..
الحكمة الثالثة تقول :_

![ بــــات مغتبــن ولا تبــــات جاتــــل ]!
ترا الليل ماله عيون..والواحد فالليل ما يفكر بعقله شرا النهار .. وجانك بتابت مظلوم احسن ما تبات ظالم..ولا تبات جاتل حد الا لين تتوثق اروحك .. حتى لو تبات مغتبن


..

قاله ربيعنا سلمت ويزاك الله خير .. اسميك ما قصرت
والحين اسمح لي بكمل مسيري ورايه درب..والحمدلله قصرت الدوب وياك..والحين اترخص..

قاله بياع الحكم...الله يحفظك.. و هااا .. خذ بالحكم اللي عطيتك اياهن..بيفيدنك ان شاء الله

..

كمل مسيره ربيعنا .. و عـ قولتهم كمل مسيره " بـ خفي حنين ".. امبونه راد بـ الـ 3 نوق اللي اشتغل بهن .. احينه راد بـ حكم ..!!!!!


●
●
●

كمل مسيره ربيعنا .. و طاف النهار عليه وهو بعده يمشي..يوم اداه الليل جان يشوف قافلة ينزلون الرفاع وينزلون عدتهم بيباتون الليلة هنيه شكلهم وعندهم خير من الرجاب ومير البيت لسنين وسنين ..ومن كل شي امرة..
ومن شافو ربيعنا حلفو عليه الا يريح وياهم ويتعشى وبالباجر يكمل مسيره جان يبا...
المهم ربيعنا تعشى وفرشو له فراشه للرقاد..وحطو روسهم.. يوم حط راسه جان يشوف السما .. وتيي عينه عـ نجمة سهيل .. قال هاااا .. انا بياع الحكم قالي لا تامن للسيل اذا شفت نجمة سهيل .. ونحن احينه رقود فـ وادي.. شو درانا جان يانا السيل وشلنا الوادي ولا عندنا خبر .. أنا بخبرهم نسير فوق عـ الحزم نرقد أحسن..
قالهم..يالربع انا أشوف نجمة سهيل .. والواحد ما يعلم .. جاد أيينا سيل فـ هالوادي ويشلنا .. ترا الحكمة تقول جي جي جي ..
تمو يضحكون عليه ..اوووه وين انته هذي حكمة جديمة ياريال .. لا تخاف انت حط راسك وارقد و جانك ماتبا قم سير عـ الحزم عند الدبش برايك..
ربيعنا شل بعمره ورقد عـ الحزم .. يوم أداه الصبح ... نش يدور الجماعه .. شاف انه مالهم اثر موول .. قال لا حول الله.. الوادي يرفهم (جرفهم ) كلهم أنا خبرتهم بالحكمة لكنهم ما سمعو لي ..والحين هالقافلة وهالخير كله وين أوديه..لكن اظني ربي كاتب لي هالغنيمة .. وهالقافلة ..عوضني بها عن اللي بعتهن لبياع الحكم..
وهالحكمة الأولى وظهرت صح..يزاه الله خير هالشيبة ..

●
●
●

المهم ربيعنا كمل سيره..وعنده القافلة وهالخير كله .. عـ المغيربان جي .. وصل شرا المدام .. و شاف واحد عـ العرقوب و موري ظو..

السلام عليك
وعليكم السلام والرحمة .. أقرب أقرب .. والله ما تسير قبل ما تتقهوى وتتعشى ..
قرب ربيعنا عند الريال وتقهوى وتعشى.. قاله الا تبات عندي وباجر برايك جان بتكمل دربك ربي يحفظك..
باتو يلووس عـ الظو يسولفون .. والريال عيونه يتصالقن .. شك فيه ربيعنا قال الحينه اذكرت حكمة بياع الحكم لكن حرام اظن به بالسوو .. انا بشوفه قبل .. ويوم ظحك الا ظروسه فرق بعد .. قاله اممم انا أخافه الا يبا يتعشى بي لكن انا بتغدى به قبل لا يتعشى بي وجانه مبيت النية بيحصلها مني..الا جان يبالي الخير..انا ببات اراقبه شو بيسوي

الريال فرش لربيعنا الفراش وقاله برايك ارقد انته تعبان ووراك درب بعدك..من حط راسه ربيعنا ما رام يرقد تم الا مبرج عيونه من تحت اللحاف ويوايج عـ الريال .. تم يفكر ..قال جذه ما ينفع اخافني اغفل من التعب وايي ويجتلني .. انا بقوم اراقب ..سار و ياب ( قعلة ) ..<< اللي ما يعرفها يخبرني بخبره شووو هي :d

المهم ياب القعلة وحطاها مكانه عـ الفراش ولحفها..و سار ورا مرضام الحطب ..يراقبه .. شوية وجان يظهر الريال ..شال بيده الخنجر ويطعن به القعلة يتحرى أنه طعن الريال .. يا ربيعنا و بيده الخنجر ويظربه فـ ظهره ..قاله تبا تتعشابي..؟!!! شفت عندي هالخير قلت بتعشى به..!!
هذا اكيد قطاع طرق وأكيد جاتل وايدين من قبل وقاص عليهم انا بشوف هالعريش اشوو فيه من خير ..

يوم دش العريش .. ما حصل الا الشبرية وسامان ما يفيد .. و شاف انه شي 3 حبال نازلات من السقف وين ( الدعون ) يا لين الارض ومدفونات تحت .. تبعهن لين الارض وحفر عنهن .. اول حفرة حصل هالفخارة العودة ... متروسه لين بوزها ذهب..والثانية والثالثة كلهن سير الاولية .. كلهن متروسات ذهب..
قال ربيعنا هذي غنيمة من الله لي .. وصدق بياع الحكم يوم قالي لا تامن للي عيونه صلق وظروسه فرق..يزاه الله خير

●
●
●

مشى ربيعنا ووياه هالقافلة وهالفخار المتروس ذهب وهالغنايم كلها .. لين وصل قريته نص الليل جي .. يوم وصل قريب خيمته... ينزل الرفاع عن الرجاب وينزل هالفخار ويشل السامان بيدخله الخيمة ..
يوم يا بيدش الخيمة .. يشوف حرمته راقدة وعدالها ريال .. وعاد العرب قبل يربون شعرهم شرا ما نربيه ونكبره احينه .. لكنهم يربونه لين يوصل نص ظهورهم ولا جتوفهم ويعقصونه .. المهم شاف هالريال راقد عدالها .. و يظهر الخنجر..وهو مضّيج ومعصب

قال انا بجتلها هي وياه .. شرا ما خانتني وأنا متغرب الا عشانها ..انا هلي ما خليتهم ولا تغربت عشانهم..الا هي قلت بعيشها احسن عيشة و رضت بسفري عسب نرتاح..وشوف الحين جيف تخوني لكني بجتلها هي وياه..

من ظهر الخنجر وبيدش الخيمة يذكر نصيحة بياع الحكم .. قال انا بياع الحكم قالي بات مغتبن ولا تبات جاتل .. وجربت الحكم الاولية كلهن ..وكلهن نفعن وفادني ... باجي هالحكمة جي ما اجربها ..
وهاييج الليلة بات وما بات .. يسير و يرد عـ الخيمة ومغتبن ومضّيج..ويسأل عمره الف سؤال..
ومن أداهم الفير .. نشو العرب ..وتوها حرمته تظهر من الخيمة بتسوي الريوق ..وتشوفه .. يوم يت بتوايهه .. قالها بس عندج..
أمرة لا تقربين مني..
اول تخبريني منو هالريال اللي راقدة عنده ياللي ماعندج وفا ..
والله اني كنت بجتلج انتي وياه... من البارحة وانا مغتبن ومضّيج لكن شي فـ بالي خلاني ما اجتلج ...
ألحينه تخبريني منو هذا ..؟!!

قالت له الحرمة خاف ربك....انته من سرت عني وانا كنت حامل فـ أول شهر وانت مسافر يبت هالولد .. وهلك شاهدين عليه ويعرفون اني تعبت وأنا اربيه وأكبره عسب يظهر ريال ..و آخر شي تشك فيني خاف ربك واستهدى بالله ..

قال لا حوول الله..شوف شو كنت بسوي .. كنت بجتل حرمتي وولدي وبتحرمهم شرا ما تحرمتهم 15 سنة ..
لا حووول
والله انه صدق بياع الحكم يوم قالي بات مغتبن ولا تابت جاتل
صدق انه الليل ماله عيون ..وتبات مغتبن احسن ما تبات جاتل وعقب تتندم



طبعاً الحكم هب يديدة ولا أول مرة نسمعها ولا أظني الحزواة يديدة الا جان حد ما يعرف للحزاوي او انه محد عنده يخبره حزاوي الاوليين..لكن صدقوني كل حزواة تحمل لنا عبر ونصايح..ومب بس لنا نحن..لكل جيل

خويكم الغافري

ترقبو اليديد

[Dhn aL_3o0od]

تسلم اخوي ع الحزآآآوه بس آنآآآآ قبظت كم كلمه عندك غلط في الكتآآآبه ...هههههههه... وسمووووووحهـ ع المغـــثهـ

[راعية_ الفتك]

تسلــــــــــم خويه عالطرح الله لاهانك ياربي يعطيك العافيه

[Bedwien Heart]

مرحبابك والله بوطحنون ^_^

الحزاوي وانا قاعده اقراهن صدق تاخذ منهن العظه والعبره

واستفدت منهن وايد .. يمكن لأني اول مره اسمع ابهن <<

بس شو يعني (القعلة) ؟؟

سلمت اخويه بوطحنون على الحزاوي الحلوه وتستحق التقييم =)

[دهن عود]

مشكور ع القصه الي تحمل في طيتها الكثير من العبر

[محروم الهـير]

لاتأمن للي عيونه صلق وظروسه فرق


تسلم خويه ونتريا اليديد

[الغافري بوطحنون]

تسلمون ع المرور ربي لا هانكم

[al3need]

هلا ومرحبا
الله لاهانك على الطرح الحلو وفالك التوفيق