يا شعر ,,

[المطلعي]

السلام عليكم ورحمة الله وبركاته

اسمحولي ع الغيبه , وهذا جديدي بين أياديكم , حبيت أرفع قدره عندي بمرور عيونكم عليه

,
,
,

يا شعر وحدك صاحبي حزّة الضيق
من عنفواني لحنك امْعاشرنّي

وإن راد ربّي بكنزك في المعاليق
وأكمل معك مشوار بوح المكنّي

وأمشي جوارك في سكوك المعاشيق
وأفصح لك عْلوم القليب المعنّي

ميّزتني بعيون بعض المخاليق
سمّوني الشاعر رغم صغر سنّي

ولو الأماكن من حواليّ ما تطيق
زولي , لقيت إنْ هاجسك طايقنّي

كمّل جميلك , وإنكتب , للي تليق
فيها تواصيف القصايد , مع إنّي

كلما جمعت أوصاف جزله بتدقيق
قالت رموش عيونها ما كفنّي

جادل , تتوهني بنظره ولا آفيق
حتّى لو شْفاه العذارى دعنّي

لي خصرها بأروع رهافه , وتنسيق
لا وقـّفت غصن البنفسج يدنّي

السلسبيل بثغرها خالط الريق
وأوجانها لا هاجمن يهزمنّي

يا شعر أنا ما أسعى لشهره , وتصفيق
يكفيني إنّك نايب البوح عنّي

رح قلّها , كرسيج بأعلى الشواهيق
والموووت لو دونج حواجز حدنّي

والشوق ما حشّم عيال المطاليق
والضعف من يوم التقيتج سكنّي

ودمتي بدنيا عزّ وبثوب توفيق
وتقبّلي باقة لأحاسيس منّي

[معالي الوزير]

جادل , تتوهني بنظره ولا آفيق
حتّى لو شْفاه العذارى دعنّي

حليلله عليه انك ما فيك حيلهه

احلى شي يعيبني الوصف في الشعرر

وصف حلو والكلمات روعههه

صح لسنانك

تقبل مروري.......

[المطلعي]

معالي الوير , طلعت لوتي شراتي تحب الوصف :) صح بدنك الشيخ , ولا هنت

[الفتى الحزين]

مسموح ع الغيبه

طولة غيابك يابت درر

صغير سنك سب كلمات كبيره من شاعر كبير

الشعر ما يرخص بخويه

تقبل مروري الفتى الحزين

[المطلعي]

الفتى الحزين , عسى الله يسعدك قول آآمين

وشهادتك ولا شهادة الدكتور غسان يا الشيخ :)

[غــــموض]

يا شعر أنا ما أسعى لشهره , وتصفيق
يكفيني إنّك نايب البوح عنّي

شــاعر صــغير بأســلوب ومعانـــي كـــبيره

يــعطي العافيه المطــلعي وصــح السانك

غــــموض

[هوى اليحر]

صح لسانك الشااااااااعر

مافيييييييك حيله ؛؛؛ وفآلك البيــــــرق :biggrin:

>>>>>>>>والشوق ما حشّم عيال المطاليق
والضعف من يوم التقيتج سكنّي

تقبل مروري البسيط...

[عيوز مزوده]

ميّزتني بعيون بعض المخاليق
سمّوني الشاعر رغم صغر سنّي

الله عليك يالشاعر

ابداااااااااااااااع رغم صغر سنك

ولاتحرمنا من يديدك

تقبل مروري

[اللحظة الأخيرة]

سيدي...

رغم روعة قصائدك السابقة.. إلا أن هذه الحروف فاقت ما قبلها

متعطشون للمزيد :smile:

[المطلعي]

ههههههه الحين شعرفكم اني صغير

أووووووه صح انا قلت سموني الشاعر رغم صغر سنّي ,, توني أذكر خخخ

أشكركم جميع , وانا عادني صغير شعرا وسنا , وما كبير الا قدركم وتعليقاتكم الغاليه .

غموووض ,, انتي عاد تعليقج هذا يرفعني درجات ^^ طبعا العضوه المميزه تعطينا إحساس غيررر يوم نقابلها ^^ لا هنتي وصح بدنج

هوى اليحر ,, يا حيهم أهل اليحر المشكلجيه ^^ سوالف ^^ صح بدنج وفااالي بيرق رضاكم وأذواقكم إن شاء الله .

عيوز مزوده ,, أحلى شعور يوم تحصل وحده عيوز بخبرتها في الحياه تثني عليك , الله لا هانج وعن ترخج الدوريه على التزويد وانا اخوج

عكس قانونه ,, يا مرحباااااااا ومسهلا , ما سيدك الا ربك يالشيخ , ولا رووعه بعد روعة مرورك على حروفي , دمت بجمالك وإحساسك الندي

[الشاعره!]

المطلعي !!!

كنت -كالعاده- راح ارد عليك بابيات ،،
لكن لانك غبت مده كبيييييره راح اغير ستايل الرد!
اخليه بدون ابيات احسن... نرجع للنص

ابيات قمه قمه قمه قمة القمه ،، واسمح لي اقول لك انت اشعر من في الهير وهالكلمه دوم اقولها مع احترامي للباقيين ولاعليهم زود لكن رايي ولازلت عنده
اسلوبك تجديدي ووو حديدي يا المطلعي .. ايضا فيه رقه وعذوبه مدري الصراحه شلون ترتب الكلمات يم بعض بطريقه تحسسك ان تربط مابين الحروف علاقة نسب او دم!
جميل ماتكتبه ،، وماستكتبه اجمل ،،
تقبل مروري ،،، شاعره!
* علي فكره انا مااحب امدح :tongue:

[الخيل]

المطلعي


بحضورك هنا تتواصل مسيرة الابداع ...


سجل اعترافي ايها الفذ أن ما بحت به ,,,,
أستقطب مشاعر متذوقين الشعر بمنتدى الهير
فأبياتك ذات التأثير الفعّال لامست
أوتار كل من عبر من هنا
ليبوح لك عن مدى اعجابه وتقديره لهذا التميز الملحوظ

صح الله لسانك يالرايع
ودام الله حضورك

الخيل

[المطلعي]

شاعره!

هههههه وانا مستغرب أقول معقوله هذا يطلع من شاعره !!!!! أحيدها طايحه على خلق الله دوم

ضحّكني أوّل مقطع !!!!!! كانت تفرحني أبياتج بس يالله ماشي نصيب حلو هالمره ^^

وبخصوص أشعر واحد في الهير هني زوّدتيها حبّتين ^^ القسم كله شعرا وكل ما اقرا قصيده أقول كيف يابوها ؟؟؟؟؟؟

كلام كبير , من كبيره , وبخصوص التجديد أنا طبعي كذا ما احب المستعمل أحب المقرطس :)

ويمكن هذا سبب قلة قصايدي !!!!!!

مالي غير الـ ش ك ر , ولا يوفيج حقج أبد على التشجيع والإطراء الغالي , لا هنتي

[المطلعي]

الخيل

أرد أقرا القصيده مره ثانيه بعد تعليقاتج , وسؤالي في نفسي شـ الي شدّ الخيل فيها ؟؟
طبعا من كبر مستواج الشعري , ودايما الشعراء الكبار ما يعجبهم أي شي .

صح الله بدنج , وحضوري ما بينقطع دام انكم حاظرين هنا .

وشيلي الحزن من مزاجج :) مب راكب عليج :wink:

[قوس الربابه]

صح لسانك
ومافيك حيلة

[المطلعي]

ولافيك حيله يالشيخ

أشوف الخيل عدّلت تعليقك ؟ ليكون كنت طايح فيني هههههههه

صح بدنك , ويا مرحبا بك ملايين , نورتنا

[سهم المحبة]

صح الساااااانك ملاااين وربي لا هااانك ان شاااااء الله..

أختك:سهم المحبة..

[مبارك العامري]

اخوي المطلعي صح الله لسانك

ابيات رائعه جداً في بنائها وفي معناها

تقبل مروري وننتظر جديدك