" مـوقـف ".و." أبـيـات "

[الـلاّل]

السلام عليكم ورحمة الله وبركاته

أعزائي أصحاب الكلمات كل منّا يمر بمواقف مختلفه ( مضحكه ، مبكية ، مربكه ، غالية ، مأثرة...)البعض منها تثير حرفه للكتابة..فيكتب بيتين .. ثلاثة ..أو خمسة أبيات تصف هذا الحدث أو الموقف الذي مرَّ به ..

ومن هذا المنطلق

يسرني أن أطرح هذه المشاركة المتواضعه والتي بعنوان

" مـوقـف " ..و.. " أبـيـات "

التي من خلالها سنتعايش مع أبياتكم التي ترجمت ما مررتم به من مواقف..ومنها تشجيعاً لي ولكم في المحاولة لنرقى بأقلامنا خطوة بخطوة نحو الأفضل..

ملاحظـه : المشاركة تكون بأبيات شعرية موزونه قدر المستطاع

إلى الملتـقـى..


الـلاّل

[الهاجس]

أختي اللآل دائما سباقه بطرح الافكار والآراء المفيده .

فمنتدانا يزخر بكم وبأمثالكم .




ولي عوده .

[الـلاّل]

مرحــبــا

سأكون أول المشاركين لكي تصل الفكرة ..

لست بشاعره ولم أصل إلى مستوى هذا الإسم إنما لي أبيات بسيطة تصل إلى ثلاثة أو اربعة أحاول بها قدر المستطاع أن أعبر بها فتصبح غالية عليّ..

الحـدث
سببه إحدى الزميلات التي حصلت على بطاقة هاتف جديد لم أكن أعلم به فقامت بإرسال ( مسجات ) فاستغربت من الأمر وشككت فيه قمت بالتحري عن الرقم كي أتأكد من شكوكي لأني أعرف مقالبها فقالوا لي إنها هي ..

فكان ردي عليها بمسج يقول..

عرفتك يا الغريب من أول رساله .. ما تخفى عليّ أبد وصعب أجهلك
من فهم شخصك تبقى دوم في باله .. بعيده يا بنت(..) بس في القلب منزلك


إلى المـتلـقى..

الـلاّل

[وله]

اشكرك عزيزتي على طرح مثل هذه المشاركات الفعاله

والمفيده


لي موقف مع انسان غالي والسموحه من ذكره بالتفصيل

ولكن ابياتي توضح ما اخفيته


فهل لي بذكر ابياتي ؟


اعتقد ذلك

اسمحولي بالمشاركه




صعب راعي الشين عن طبعه يتوب=ولايتوب النـذل لـي طبعـه ردي
ولايفيد النصح في شخصن كـذوب=دام مالـه درب صوبـه يهـتـدي
صدق ذيل الكلـب منه..والعيـوب=مايغطيهـا الجـبـان العـربـدي
ياضعيف النفس لي مثلـك يـذوب=كـل مايملـح اصيلـن واجـودي
في شمالك ضعت والعالـم جنـوب=وانتهي امرك وغيـرك سرمـدي
وانتهى وقتك وشمسـك للغـروب=وانت أقل كثير من ضربـة يـدي


__________________

[بوح القــوافي ®]

صح لسانج وله ...


احستني اللال وابدعتي بمواضيعج المميزه وافكارج اليديده من نوعها




فقد اغلى انسانه ..باسلوب احاول الحينه ما اكرره
كنت زعلانه منها بسبت سالفه قلت لها عطيني فرصه افكر وماباج بهالوقت لا ادقين علي ولا ترمسيني
ويوم اتصلت عقب يوم بالضبط وانا كنت اعرف من قبل انها هب غلطانه بس قلبي كان مجروح بسبت السالفه
عسبت جيه قلت ببعد
يوم اتصلت انصدمت بخبر وفاتها الله يرحمها
وكرهت عمري اني زعلت منها وتماديت بزعليه
وانا الحين ما افكر ازعل ابد من هلي وناسي
عسب ما ينعاد هالشريط

للعلم هي من العين كانت بعني بعيده عني كانت صديقه طفوله وانا من دبي...فما عرفت الا باتصالي ع بيتهم

بس لي فقلبي كان كبير هب اني بوصفه بابيات
دخلت منتدياي بعد فتره طويله وسرت صوب المحاورات
واول ما دخلت محاوره بالحرف يعني باخر حرف ..
وكان حرف الهاء

وكتبت ثلاث ابيات ارتجالي بليا ما افكر مادري كيف ظهرن

وقلت

هلي يا دموع العين ع فراق غاليج .. ناسٍ سكن حبهم في حنـايا القلب
لو تجـــف لدموع ادري ما بيرضـيج .. الا لقاهم في يوم تحــت ظل الرب
بس حكمت الخالق وله بكل امر حق .. مصيري اكمل لو من دونهم الدرب



اشكرج عالموضوع الغاليه ولي عوده دايمه

بمواقف وابيات



والله يرحمها ويرحم كل موتا المسلمين ويسكنهم فسيح جناته





وداعة الله

[بوح القــوافي ®]

السلام عليكم


هااا انا من جديــــــد



المهم



انا الله يسلمكم دوم فالبريكات اسير عند ربيعتيه .. ودوم وانا وياها نسولف عن كل شي
والوقت يمر بسرعه بسرعه فضيعه

وفالكلاس الساعه ما تتحرك ..

المهم مع الايام قلت لها تدرين بكتب عن هالساعه بيت ...ذلتنيه بعدنيه ما تنفست يخلص البريك
جان تضحك وتقولي كتبي انشوف شو بيظهر منج ...


بعد كم من يوم كنت يالسه عالفتوشوب وصممت بطاقه محتواها صور ساعات في ساعات
وبعدين قلت بكتب لي وعدت ربيعتيه به
وكتبت عن الوقت لي وياها يعدي ثواني ...

كل ساعات الزمن ضـدي وساعتي وياك مسرعها .. ابحلاة الثواني لي تعدي ،، وبجوك انا اقضــيها
ودي اجمع كل ساعات هالكون بيدي واكــسرها .. لان مابا يشغلك شــــــي ٍ عن مشاعر انت مالكها
وليت اسمع نغم صوتك يداعب مسمــــــعي لبـرها .. واسمع سوالف ٍ تسعد وتنسيني الدنيا ومساوئها


طبعا ..قالت محاولتج شرا ويهج ...شوو ها لي يقرااه يقول حق حبيبج ههههههههههههاااااي
المشكله اني جيه يوم اعبر وحليلي ...وهذا وانا احاول ...يعني لازم اتشجعني هب تاكلني وتهزبني
هههههههههاااي







لي عوده ..

[الـلاّل]

ما اعرف اضحك ولا ازعل من مشاركاتج الثنتين يا بوح القوافي..وحدهتعور القلب والثانية تفرفر المخ هههههههه

شكرا للجميع على المشاركه..

واسمحولي أحط مشاركه بسيطه سببها كنا في زيارة لأقاربنا وفي اجتماعنا كان هناك (عروسين) متزوجين حديثاً فرأيت حديثم ونظراتهم الجميله فكانت مني هذه الدندنه البسيطه التي لا أعتبرها أبياتاً إنما دندنة كلمات..

في ضحكهم وكلامهم .. على المكشوف إحساسهم

ما همّهم من يناظر ما همّهم ... دام بالحلال اجتماعهم

حب وغرام في عيونهم ... شوق وهيام يلفّـهم

شمس وقمر من قدّهم ... كل الطيور تغرّد لهم

عسى الفرح دايم لهم ... وتبقى المحبه بينهم

***

وتبقى الدندنه بيننا متواصلة أعزائي..

إلى الملتقى..

الـلاّل

[oo قماري oo]

ختيه اللال المتالقه دوما ... اشكر شخصك الكريم على الابداع ... فعلا فكره مميزه ..تسلمين يا لغلا ....

مممم عندي ابيات كتبتها لما سمعت بخبر زواج ربيعتيه وطرشتها حقها مع هديه العرس .... هي مجرد محاولات لا اكثر ...
يانى الخبر والفرح في القلب ما زال ..... يا طير بلغ تباريك للريم في الحال
هاض الفؤاد وثار في الجوف شلال ........ .واتوافقت كل العواطف على الحال
دالوب شعري هاض وابديت الاقول ....... ياليت لسانى يشل شلات موال
القلب حب الزين والحب قتال ..... وطبيعه الانسان للزين ميال
قالوا جمال وحسن في الناس تختال .. . والعين حلوه وزاهيه بليا كحال
دين وقيم عادات فذه واجلال ..... وهذا قليل الوصف فيك يا الريم ينقال
الحق حق وكمله الحق تنقال ..... العمر يمضى والزمن سيف قتال
يا خالق الانسان من طين صلصال .... يالله توفقها لخير الاعمال
مطلوب عذري كان في القول مزلال ..... ويالله بالتوفيق في كل الاحوال

والسموحه يا غناتى على القصور .....

ودمتم بالف ود

<<<<< ولي عوده

[oo قماري oo]

عدناااااااااااااااااااااااا ...

السلام عليكم شخباركم شعلومكم ....

عندي ابيات انكتبن لما كنت في الجامعه وباقي اسبوع عن ننزل البلاد لعيد الفطر ... وكنت متوله على هليه وايد ..

مشــتاقه لج يا بـــلادي
شـــــوق الطفـــــل لحضـن أمــه

الظـــروف غيرت عنج المسـار
في الجامعه أعاني الشوق وهمه

بعد فـراق ثمان أسابيع كبار
نحســـب الوقــت والـدقيقه مهمه

كلها أســـبوع ونكـــون بالــدار
بين الأهـــــــل ووســــــط اللمـه

وسلامتكم

ودمتم بالف خير ...

ولي عوده .......

[بنت الرياض]

السلام عليكم ورحمة الله وبركاته

الموضوع رائع

وأليكم مقطع من أحد خواطري المتواضعه التي سجلتها لانسان غالي


مستحيل أنساك في لحظة
وأن نسيتك تر والله نسيت أسمي معك
كيف أنسي حروف ومعاني سطرت في قلبي جروح
جرح قلبي من سبب بعدك بعده يصيبه النزيف
كيف تقول أني أقدر علي النسيان أنا إنسان له قلب وأحسا س
وقلبي غير قلبك يا خاين الإحساس
إحساسي أبوجودك يمي شئ عظيم
لكن إحساسك وأنا يمك وش يكون



ولي عوده أن شاء الله

[بوح القــوافي ®]

السلام عليكم ...




انصدمت ..من وحده من رباعتيه ...طرشت ليه رساله لانها احينه هي هب ويايه ..

استانست عالرساله قبل لا اقراهااا..


لكن لي قهرنيه السالفه لي كتبت عنها

السالفه ان هي فرقت بينيه وبين انسانه انا وياها من ثاني اعدادي ...


وبعد ما سوت لي تبااه يايه بتعتذر .... اعتذارها لا بيجدم ولا بياخر عسبت جيه هب بحايه له ...ربي يسامحها ياربي وينور دربها بعيد عني

كتبت لها هالابياات .. والابيات البارح واصله لها ..


النذاله فيك وفي طبعك لقـيته .. كيف ترضى تبدد احلامٍ بريئه
كل خليه من سم حــبك سقيته .. ماتت اليوم بلمــــحه سريــعه
فيك كل امل عمري بنيـــــــته .. حطمتها باســـــــاليبٍ مريعه
للاسف حبك لي بقلبي رعـيته .. صار بحياتي اكبر خـــــطـيئه



وصقد هالانسانه اول انسانه ..اندم اني قضيت ثواني وياها ...او اني هديتها احترام


للحين تستاهل الاحترام ...وربي يحفظها ... ويهديها وما تندم وتخسر غيريه بسلوبها




اشكرج غناتي عالموضوع <<<<<اظهر فيه قهريه ...


اصلا نسيت السالفه ...بس مادري حاسه بقهر ...جان اذكر السالفه ههههههههههههاااي



وداعة الله

[بوح القــوافي ®]

السلام عليكم ورحمة الله


وردينا من يديد


هالمره ...شي بسيط


والموقف ما يحتاي اذكره بتفصيله


لكن المحاوله بتخليكم تعرفوون السالفه ...وطرشته مسج حق حد من الاهل


مشـــــوش الفكر ومعــتفس الــحال .. لــــي عن ربه اليوم مــبعد خـطاه
لا يرقد مرتاح ولا يــــــهنا له البال .. هذا حال لي يجــعل بالدنيا رضاه
يستلذ بمغريات الدنيا ويكود المال .. وينسى ربه وينــسى اداء الصلاه
النهايه هو في قبره ويا الاعــمال .. لي عمل بها ابــن آدم في دنــياه




بس المحاوله هب لين هناك السموحه ..




ولنا عوده باذن اله

[بوح القــوافي ®]

شكله محد عنده مواقف الا اناا


خلاص ما بشااارك لين حد يشااارك قبلي




هالابياات البسيطه..كتبتها لخاليه .. يوم اني كنت مضييجه..ويوم رمسته
قالي تري بييج دبي(هو من العين)
وياني وظهرنا البحر وسوالف واستانست ونسيييت كل شي ..


هو فرحة ايامي وهــــــو اعيادي .. غلاه وقدره في القلب راســـي
شانه عظيم وفي شوفه اسعـادي .. حبه في سويد القلب له ساسي
روحي غدت من حبه في سـعادي .. وعندي غلاته عالعين والراسي
له الروح مرهونه هو سيد اسيادي .. هو بوسط القلب ماظنه متناسي



وباقي 3 ابيااتي بس ماروم اكمل لانه فيهاا رمسه خااصه وبس







وداعة الله

[شماسي]

لي موقف خطير سويت فيه شعر يوم كنت ثالث اعدادي
هههههههههههههه

مره يوم راجعه من المدرسه نزلت من السياره وجان احدر البيت ولقيت اميه قاعده في الصاله حبيتها وقتلها اميه من زود مشتاقه لبويه اشم ريحته في البيت وانا صج كنت اشم عطره

قال زين ابوج تراه عندنا وفي الميلس وانا خاطفه بركب فوق وافر الشنطه والشيله وكل شي وخطفت اركض اميه تزاقر وانا مستحيل ارد عليها
وركضت بالعباه بس خخخخخخخخخخخ
وجان افج باب الميلس اعرف ابويه دوم يحب ييلس في الميلس يوم يبا يسولف في التلفون عقولته يالس اغازل هههههههههههههههههههههههههههههههههههه

ويوم فجيت الباب قلت بوووووووووووووووووووووووووووووووووووووووووويه حبيبي واركض واطيح بجبده والريال فاج عيونه
واقوله حبيب ولهت عليك قام ابزويه واقف وجنه دزني من فوقه حزت في خاطريه قتله بويه شو فيك وشويه بصيح
قالي سيري داخل مابا اشوفج في البيت
لييييييييييييييييييييش؟؟؟

شو سويييييييييييييييييييييييييييييييييييييييييييييييي يت

والدموع عشرين يرضفن عشرين

وجان يقولي حووو اتمصخر ويااج ويلس يجبني ويحضني بس عقب شو
انا واايد حطيت في خاطريه
وقتله زين خلاص بسير ابدل وافصخ عباتي وبرجع
قال بترياج ترانيه امزح قتله زين ونا كلي حزن

سرت غرفتيه يلست اصيح وااايد
واايد وما بدلت ثيابي وقفلت باب عليه

لقيت جدامي ورقه وقلم

كتبت

ليش يابوي عقب غيبه تسوي فيني جذي
قلبي مشتاق لمزحك وحبك بس هب جذي

ياليت يابوي تحس فيني ولو مره
وآآآآآآآه في قلبي دوم محتره

احرقها بالضحك والتسالي
وانته بعيد عني و سالي

يابوي احبك حيل والله
ومشتاقه منك لضمه


ما يكفيني اتصالك في بعدك
ولا يكفيني مزحك في قربك
اباك دوم وياي متهني
وتقولي طلبي وتمني >>هذا همج خخخخخخخخخ

احبك





والله هالكلمات كتبتها وانا اصيح من خااطريه

بعدين رقدت ويوم قمت العصر يلس بعده يقولي بلاج خلاص عاد لا تستوي دلوعه
ورضيت
ههههههههههههههههههههههههههههه

[الموناليزا]

موقف...حبيت اني اخبركم ياه...

الموقف استوى اليوم...

في كلاس الماث وكالعاده من الملل شغلت الاف ام ويلست اسمع فيه برنامج مال جابر عبيد...
السير ما انتبه ولنه ملل الكلاس ومافيه درس يديد بس يالس يرتب شغل البحوث...

جان ايصيح التيلفون وفزيت^_^ بس هزاز حسيتبه ..يوم اشوف الرقم انها اختيه قلت غريبه شو عندنا اتروعت قلت شي مستوي...

رديت وانا خاشه التيلفون..طلع الحبيب "...." ولد ختيه الصغيرون اونه ماسار الروضه^_^ فديته ومحتشر على امه الا اتسويلها...^_^ ...

وانا داقه سوالف وياه فديته..والعرب مندمجين فالكلاس يحلون مادري شالسالفه...يوم سكرت اعد فيه ذيج القصيده فذمتيه يستاهل اعد فيه قصايد هب الا قصيده...

قلت فيـــه..

ياني اتصاله وانشرح صدري...ياطيب منهو مثله ومنهو يساويه..
الفا علينا بنوره من بــــدري...في قلبي له غلا محد يباريـــــــه..
محلى كلامه فدوته عمـــري...افديه بروحي يعل ربي يخليـــــه..
غلاه ياناس فالوريد يجـــري..كيف ابتعد عنه وانا دوم احاتيــه..
حبه بقلبي والغلا له يســري..افرح بشوفه و"عنوني" انــاديـه..

الله يحفظه ان شاء الله ...


وهاموقف وعدينا فيه قصيد...

ودمتمـ بكل خير
poneeta

[الـلاّل]

عودة إليكم بموقف جديد أثار الحرف

هذا الموقف كان من أحد الأقارب يسأل إن كنت كاتبة للشعر فقد سمع بإشاعة أني شاعرة ..فأنكرت هذه الإشاعة لأني لست بشاعرة ولا استيطع كتابة القصيد فكان مصراً على صدق ما سمع <<<<< كان بيضااربني هههههههه

فكانت مني هذه الأبيات البسيطة..

هب كل من رتّب الحرف بشاعر .. الشعر بحر وله ناس وناس
وأنا طفل صغير في وصف المشاعر ..خطوتي قصيرة ب ما تشكي باس

لا أعرف كيف خرجت هذه الكلمات ..فطلب مني كتابة شعر فيه <<<<<<<<<<<<<< هب شايف خير ومصدق السالفة لو بعدني مطلع الشمس ههههههههههه

فخرجت هذه الكلمات..

يا ابن الناس حرفي ما هو بسهل يكتب لك أشعار .. ما أملك الإحساس إلا بصادق النية
ناس تجي وتروح وفي قلبي ما تترك آثار .. و ناس راسخه لها قدر و تسوى عينيّه

وسكرنا السالفه :c033:

إلى الملتقى... والشكر لكل من شاارك

الـلاّل