يلست سوالف ...................زعلتني ^^

[رحــــــاله]

السلام عليكم و رحمة الله وبركاته ..

كيف بتعارض الناس و إنته الوحيد ( المختلف بالنسبالهم ) ..؟

صراحةُ اترددت وايد قبل لا أكتب هالسالفه بس في النهايه قررت ^^ ..

كنا شله يالسيين و انسولف عن هالدنيا و من بين الأحاديث دخلت سالفة البدو و الحضر ...وكان الحوار كالتالي ..
فلانه اتقول : صراحة البدو ناس ..يعني أنا ما بقولكم ما يفهمون بس هاذيلا ناس منغلقين ..كابتيين على بناتهم حتى السوق ما يطلعن ..(ما اتكلمت تميت ساكته و اطورت السالفه ) ....يعني أنا مادري شو هالناس عيب البنت تسيير عن ربيعاتها عيب اتشبر برا الباب عيب تطلع ..كل شي عيب و منقود وإذا حد رمسها بيجتلونها ...(وتمت تتكلم وبعدين دخلت في سالفة جرايم ما جرايم ) جان اتقول والله ماحد غير بدو العين عندهم أبشع الجرايم ( و أنا اهنيه بعدني ساكته ما اتكلمت )..جان تدخل في سالفه صارت ..جريمة إنا بنت ذبحوها أهلها بسبب ولد ما في حياته عرفها ! ...( ما خلت شي ع البدو ..وكل شي تييب سالفه )

المهم

قمت جان اتقولي ها وين تبين بعده كلاسكم ما بدى ..قتلها رمستج ما عيبتني ...من متى واحنا نحكم على الناس ! جان اتقول اوووه انسيت والله آسفه ما كان قصدي أجرحج ..رديت و قتلها في كل مكان الزين و الشين ^^ و إذا هذي وجهت نظرج ..أنصحج لا تمشيين ويا بنت عقلها محدود ومكبوته وما تطلع من البيت ...

شو رايكم في الناس إلي تعتقد هالاعتقاد ؟ ...وهل من حق الناس إنها تتحيز للمكان إلي هم فيه ؟..
و شو في اعتقادكم الفرق بين بدوي و احضري ؟؟؟

......
آسفه طولت عليكم ...بس شي كان في خاطري و طلعته ^^

تقبلو خالص إمتناني

تحياتي

[عيناويه وافتخر]

وااااااااااااااااااااايد تستوي ها الاشياء وليش شو فيهم البدو والنعم فيهم

محافظين على العاادت وبعدين اكيد البنية ما بتظهر برووحها ونحن البدو وراضين بها الشي

الحين هي شافت الشي الشين وليش ما تشوف الموضوع بنظرة ايجابية وليش ما رمست عن الحضر

كل مكان فيه شي زين وشي شين سواء كان عند البدو او عند الحضر

السموووووووووحة

[***بدويه كسرتيم***]

والله أنا اشوف أن البدو شرااات الحضر وان الحضر شرااات البدو كلهم من نفس الطينه .....

وأن البدو محافظين على عاداااتهم مهما تغيرت الحياه عندهم ..... وبعد في منهم الزين والشين

ما أقولج كلهم ......... والسموحه منج

[الموناليزا]

وعلسكم السلام ورحمه الله وبركاته

مراحب خيتوو

لو منج مب صاكته الها هالكثر الناس اجناس بقولها تاج راسج بعد يايه اتغايضين ليش شو اتحرا عمرها هع والله غريبه الدنيا الحين كل شي بالعكس يمشي سبحان الله

بقولها الواحد بأخلاقه ودينه وعلى الطلعه وماطلعه نحن حاشمين عمارنا مب لكل من هب ودب طلعنا وروحنا نسير نهيت عنبوها سيره بلا شور الولي بالعكس المشاكل بين من الطلعات اللي مالها لزمه يعني لو بغيت السوق شو ابا ازف ربايعيه ويايه يعني سايره انا احوط واراوي العالم عمريه ولا سايره اقضي حايه >> متحمسه خخخ طلعت عن الموضوع

تسلمين خيتووو بس ليتج ما سكتيلها وعرفتيها قدرها شي عقل اتفكر به قبل لاتقول هالرمسه ..

[جنون الحب]

كل النااااس سواسيه كالاسنان المشط

مشكووووره ع الموضوع

يسلموووووووووو

[رواضـي]

أنااااااا رايي من راي بدويه كسرتيم


يسلمووووووو ع الموضوووووووع

[شوشه للشقق المفروشه]

صدقتي فديتج فكل الي قلتيه

و واااااااااااايد نسمع من هالكلام الي ماله اول ولا تالي

بس ما اقووول غير الله يهدي الجميع

مع انه هالكلام ما له داعي

وبارك الله فيج حبيبتي

ونتريا يديدج دوووم

مع التحيه

اختج

شوشه للشقق المفروشه

[رحــــــاله]

مشكووووورات و يزاكن الله خير ع المرور ^^

معاكن أنا إنا هذا الشي عادي وممكن يصير ...وفعلاً الناس سواسيه ..بس في ناس بعدها عقولهم مريضه ^^

..و أقولج يا _Poneeta _ تراج معذوره .... بيني و بينج يبالها (^^.)

............

مشكوورات ثاني مره حبوبات على ردودكن الحلوه ....

[%مجنون سويحان%]

مشكورة اختي على الموضوع

[رحــــــاله]

العفو ..(%مجنــون سويحان%) و يزاك الله خير ع المرور ..

تحياتي

:)

[حكومه الكعبي]

عدتوا اليكم من جديد
ههههههههههههه
الموضوع عن العيم والبدو

كل واحد منا يعرف شو تعني الكلمتين

وأنهن مختلفات
يعني عادات البدو وسنتهم وتصرفاتهم
غير عن عادات العيم


والكل منهم يقول أنه هوه الاحسن ومحد بيذم عمره شي طبيعي هذا

بس طولي بعماركم

الواقع والحقائق والحياه الي نحن أنعيشها

تبين النا أن حياة البدو
زينه
وأستر وأحسن
وكل شي زين فيها موجود

وبعد الحياة الي نحن نعيشها الحينه ومتطلباتها أتقول ألنا أن العيم أو الحضر

حياتهم وتصرفاتهم
وكل شي فيهم أحسن من البدو

بس الواقع يقولنا

أن لكل قاعد شواذ

يعني البدو مب كلهم زينين ولا كل تصرفاتهم زينه
والعيم مب كلهم زينينن ولا كل تصرفاتهم زينه
والعكس صحيح

والواحد لازم يوم بيرمس يرمس عن شي محدد ويناقش فيه

ونفس ما مقيول أن الكلام أخذ وعطاء

وفي هالاخذ والعطاء

تنطرح أراى وفرضيات من قبل كل الاشخاص

يعني يا صح يا غلط لانا قلنا راي مب حقيقه

وكل شخص فينا يقول الي هوه معتقدنه ومومن به

بس هالشي

مب كتاب مقدس ولا قرآن أستغفر الله


يعني هالكلام مب صح 100 %



العيم والبدو

ناس ما يختلفون في شي

اللهم البيئه الي عاشوها مختلفه

علشان شي أختلفوا في أشياء وأتفقوا في أشياء

والسلام عليكم ورحمه الله وبركاته


.....

طويلت العمر راعيه الموضوع ما واحيت أحفظ أسمج عاد سمحيلي لاني ما بقوله
ههههههههههههههههههه



لو أنا منج بقول لر بيعتج
خلصتي

أذا قالت هيه
قوليلها
هذا رايج وأنتي مب الرب علشان الكل يقول أن كلامج زين

ولا ما تعرفين شو تعني كلمه البدو ولا الحياه البدويه

دوريلج معجم وفسريها


علشان مره ثانيه قبل ما تتكلمين تعرفين في شنو تتكلمين

مب علشان شي
بس علشان يعرفون أنج عاقل مب ياهل
أتقول كلام ما تعرف شو يعني
ههههههههههههه



ودمتم سالمين


صدقوني هذا كله أختصار
ههههههههههههه

[جريح الحب]

يا ختيه البدوي اصيل اصيل ياختيه محافظ على عاداته وهناك ناس مازالت تحافظ على هالعادات والدم حار تراه

وماقصرتي على هالموضوع

اخوكم جريح الحب

[يـآس]

حنّا بدو

حنّا بداوتنا شيم
دين وقيّم

معنى كبير
ما أظن مثلك يعرفه
لو تدعين المعرفه
شي عسير

ما أظن مثلك ياصله
صعبه ولاهي حاصله



******

اختي Khanoom

والله هالبنت باين من كلامها ان عقليتها مريضه
والتجادل معاها بينزل من مستوى عقلج الرزين لتفكيرها الجاهل

والموقف الي صار معاج يدل على ان البدو عندهم حكمة وفطنه وطولة بال
واشكرج اختي على ردج عليها بـ هالطريقه
الحقران يقطع المصران

وخلي يكون لج رد ثاني .. وسمعيها قصيدة طلال السعيد عن البدو والا قصيدة حامد زيد
وخليها تعرف الفرق بين البدو والحضر

وطبعا الكلام مب عام
مثل ما في البدوي الاصيل في
حضري اصيل

*
*
*

وقالت بدو

وصدت وقالتها بقرف
بنت الأكابر والترف

متكبره .. متعاليه
يعني بدوي يقعد طرف



قالت بدو


والمعنى دون المستوى
ماحنا وياها سوى
احنّا بنظرها من نكون ؟
ريشة يطيرها الهوى



مفهومها حنّا عدد
رقم ولا أكثر بعد
يعني مجرد تكملة
ولا فهي أصل البلد





قالت بدو


تعني صفر على الشمال
هذا على أحسن احتمال
تصدر حكم ، ما تلتفت
تحكم ولا تترك مجال





قالت بدو


متصورتني باستحي
وأترك مكاني وانتحي



وتفاجئت .. تغيرت .. تلعثمت
ما تدري أني بافتخر .. ولي الفخر !!





حنّا بدو
حنّا عمى عين العدو



حنّا البداوة وضعنا
وأهل الوفا هم ربعنا
حنّا نتفاخر بأصلنا
يا بنت هذا طبعنا



ماهي بداوة تلفزيون .. ولا مسلسل أردني
بس بدوي بالميكرفون .. ولا هد سيفه ينثني



ولا بدو بيت السدو





حنا البدو

حنا بداوتنا الأصل
بالقمة حنّا مو أقل
حنّا بداوتنا تراث
من جيل لي جيل انتقل

حنا معاني ساميه
نروي السيوف الضامية
نرد المنايا ما نهاب
لو هي سعاير حاميه







حنّا بدو

حنّا البداوة عيدنا
ما ناكل إلا صيدنا
ما نعيش عالة مجتمع
نموت .. ما نمد أيدنا





حنّا البدو

حنّا البداوة بدمنّا
ما نسمي أحدٍ عمنّا
حتى ولو منهو يكون
لو هو زعل ما همنّا





حنّا بدو


حنّا البداوة عمرنا
ماحد بيصبر صبرنا
لأنها مصنع للرجال
نمشي وتمشي بأمرنا





حنّا البدو


حنّا البداوة أصلنا
حنّا البداوة فصلنا
حنّـا بدو متماسكين
وهذي نتيجة وصلنا



يا بنت ياللي تضحكين
قلتي : ابدوي تستهزئين؟
غرك لباسك الأجنبي
والمشكلة ما تعرفين



أن البدو أصل العرب
تبغين هالكلمة طرب
صارت نشب



يا آنسة
يا عانسة
يا ضايعة ومستانسة



يا تارسة وجهك صبغ
يا تارسة عينك شدو





حنّا البدو


ولو كان قلتيها بقرف
لنا الشرف





أنّا بدو

حنّا بدو


حنّا بداوتنا شيم
دين وقيّم




معنى كبير
ما أظن مثلك يعرفه
لو تدعين المعرفه
شي عسير

ما أظن مثلك ياصله
صعبه ولاهي حاصله





كلمة بدو !!
تعني التمسك بالجذور
ماهو التخلف والجهل
ولا بعد حب الظهور





كلمة بدو
تعني الشمم
فعل وكرم
مبدأ حضارات الأمم
حنّا القمم
نارٍ على راس العلم
يشهد لنا سيف وقلم



وإن كان ما عندك خبر
لنا الفخر

لو عشنا ببيوتٍ شعر
عيشة ألم .. عيشة فقر
عيشة تعلمنا الصبر
ما نقترض لجل السفر
ونحسّب أيام السفر
ما نفترض .. ونعيش واقعنا بحذر
وبالضيق نرخص بالعمر



نشرب من الماي الهماج
ونكحل نواظرنا بعجاج
وغسيلنا حفنة رمل
هي الدوا .. واهي العلاج



عيشة رضا .. ماهي نكد !!
ما فيها تعقيد أبد



ساعات ما نلقى ذرا
يكفي نتلحف بالنجوم
وفراشنا رمل الثرى



وسراجنا نور القمر
لا من ظهر
وننام من عقب العشا
ونصحى قبل وقت الفجر
نؤمن بقضانا والقدر


ماهو كسل
ولا نعيش بلا أمل
نملك طموح
علم وأمل
ونرعى الإبل



ونرعى الغنم
ونعزف من الونه نغم



ونتابع أخبار المطر
وندوّر الروض الخَضَر



ونسري ورا
برقٍ سرى
ولا نتراجع للورى



ونبحث عن المرعى العشيب
ومن شعيب إلى شعيب



ما نستقر .. عنواننا كل الديار
تجوالنا ليل ونهار



نعيش عيشه هاديه
وهذي حياة الباديه



سنة الربيع .. سنة دهر
ورغم الفقر



نخاف من قولة أفا
ونتعب على قولة نِعِم
ونعيش عاليين الهمم
من فضل ربي ما نخون
نرعى الذمم



ونركض ونتعب ما نمل

ماحنا مثلك لا شغل ولا عمل



ما غير بس أكلٍ ونوم
ومن الشحم ضاقت عباتك والهدوم



يا أسمن أنواع الحريم
يا عايشه على الريجيم



يا آنسة
يا عانسة
يا ضايعة ومستانسة



يا تارسة وجهك صبغ
يا تارسة عينك شدو






حنّا البدو
ولو كان قلتيها بقرف
لنا الشرف




أنّا بدو

ياللي تقولين ابدوي
أنا ابدوي
ولي الفخر أني ابدوي
عزمي قوي
ما أخون
ما أبوق الخوي



يبدأ نهاري بالصلاة
وأصارع أمواج الحياة



ما ضاقت الدنيا أبد
ولاني من أصحاب الحسد



أرفع ايديني للسما
وأطلب من الله واستخير
ما اقول يمكن ربما
ولا يصير .. أو ما يصير



محافظ على الخمس الفروض
واضح ولا أحب الغموض



ولا أتلون والتوي
لاني ابدوي



متمسك بأصالتي
ولا أغير لهجتي

أنا ابدوي
في فزعتي
وفي قومتي
وبقعدتي
وفي مشيتي
وفجلستي
وفي كلمتي
وبنخوتي
وحتى عقالي ولبستي

ولو قلتي عني فوضوي
ما ضرني
بالحيل يا بنت ابدوي



ويسرني أعرف .. من أنتي ؟
ومن أنا ؟
والفرق واضح بيننا

تدرين وأدري من أكون ؟
ويكفينا نعرف بعضنا



أنتي مثل عمر الزهور
مالك عمر
مالك سنين
شهرين ويجيك الجفاف
وتذبلين



وتصبح ألوانك باهتة
وأنا جذوري ثابته



ماخذ من الصحرا الهدو
وإن كان هذا يسعدك
حطي على راسك يدك



هالمرة لا قلتي بدو
يا تارسه وجهك صبغ
يا آنسة
يا عانسة
يا ضايعة ومستانسة
يا تارسة وجهك صبغ
يا تارسة عينك شدو
حنّا البدو



ولو كان قلتيها بقرف
لنا الشرف



حنّا بدو



للشاعر: طلال السعيد

[ابو عذاااااب]

السلااااااااااااااام عليكم


اختي هاي نفس سالفتج وشوفي الرد


هذه قصة صارت في إحدى الكليات لطالبه بدويـــــة ترد على طالبة جامعيــــة في قصيدة

قويـــــــــــــــة!!!

يُقال أن إحدى الطالبات

تسكن في إحدى القرى وكان يغلب عليها طابع البداوة من حيث لبسها لقلة ذات اليد ، وكانت من

المتفوقات في دراستها .. وذات يوم مرت إحدى الطالبات ورأتها فقالت: ( شوفوا البدوية..)

فحزت

هذه الكلمة في نفس الطالبة.. فلما وصلت بيتها كتبت هذه القصيدة التي هي حقاً رائعة فعلاً وهي

مايلي:-

إيه بدوية ريحتي بُن وبهـــار = هذا شرف ماهو بحقي خطية

أنا بدوية بنت حرٍ من أحرار = فزعات ربعي بالشدايد قوية

أناهلي يابنت وافين الأشبار = كأنك جهلتي من أنا ياغبية

ياجاهلة ماتغتذي الشمس الأنوار = حنا كما شمسٍ على الأرض ضيه

حنٌا هل الطولات هيبة ومقدار = حناٌ مثـــــــــال للشرف والحمية

حنٌا الطنايا للكرم رمز وشعار = حنٌا خويٍ مايخلي خــــــــــــويه

الذيب يوم إنه عوى وسط الأسعار = عشوه ربعي من سنينٍ مديه

يوم إن جدك وتٌـق القفل بالدار = بيت الشَعر مفتوح صبح وعشية

للضيف ريف للمعادين جبار = نرد العـــــــــياض ولانهاب المنية

يابنت لو بكتب من أشعار وأشعار = تعجز معاني حروفي الأبجدية

اللعب خلي اللعب لعيال شطار = لاتدخـــــلين السيل وانتي نديـــة

(وسلامتكم)

[رحــــــاله]

والله ما عندي كلام أزيده ع إلي قريته اليوم !! .....ما قول إلا يزاكم الله خير على هالردود الأكثر من رائعه ....
حكومة الكعبي : تسلم ع الاختصار الرائع .. ^^
جريح الحب : وانته بعد ما قصرت :)....تسلم
دلــــــــعوه هله : صح إلسانك خويه ...و يزاك الله خير ع القصيده...الأكثر من رائعه ..( يا ضايعه ومستانسه !!....) ^^ لو رديت جي أحسن ...
ابو عذاب : حسيت باحساسها هالبنت ....صح إلسانك ..ويزاك الله خير ^^...

يا وناستي اليوم ..شفت ردود مب بس عيبتني إلا خلتني كاشخه طول الوقت ....

تسلموووون اخواني و يعطيكم الف عافيه ع ردودكم الطيبه لي و سمحولي اتخرت في الرد ..انشلغت بالدراسه وما قدرت أدش و أرد عليكم ...

..........

يعطيكم العافيه ...

ياجاهلة ماتغتذي الشمس الأنوار = حنا كما شمسٍ على الأرض ضيه
كلمة بدو !!
تعني التمسك بالجذور
ماهو التخلف والجهل
ولا بعد حب الظهور

^^

[شماسي]

اصلا هاي البنت مالها داعي

قوليلها لو مب البدو ان جان ما لقت هالامان كله
ويكفي انه بو خليفه الله يرحمه بدوي وفخر لنا كلنا
بدوي وعمر بلاد
بدوي ووصل لاعلى مستويات
وكلمة ابدو ما نتحسس منها بالعكس وين نسير نقول نحن بدو حتى يوم نسافر الخارج
نقول انا نحن بدو اللي يبا يقول منغلقين ولا متخلفين
ما يهمنا

وبعدين هيه يعني ماعايبنها اسلوب البدو انهم قافلين على بناتهم
قوليلها اللي هيه بدويه وحشيم ما يحتاي حد يقفل عليها بروحها عارفه حدودها زين
هب شراتكن رازات بويوهكن وين تين
يعني احلى البنت تطلع وتسير وتي ويا من هب ودب
هذي الصح من وجهة نظرها
هذا التطور

امحق تطور ياربي لا تبلينا به

ماعليج يالغاليه من رمستها
وشرا هذي لا ترابعينها امره ولا تصيحين على ربعتها
وخلج بدويه وواثقه من عمرج وعيبني ردج عليها
لانه الانسان مالازم ينزل مستواه ويناقش ناس ما تفهم
الرد على الجاهل جهل
ويعطيج العافيه

[رحــــــاله]

يزاك الله خير خويه ...شماسي ...
ع ردك الواضح ...هذي ما تمثل الحضر بعد ..ما بلوم الناس ع تفكير إنزرع في عقولهم ..هذا اعتقادها و هي حره ...

تسلم شماسي .. و صدقت ماشي أحسن عن إن الواحد يثق و يفتخر بنفسه ... ^^

يعطيك العافيه ..