o.O روف بي لا تمتحني من سبايبك ابتليت O.o [الأرشيف] - [ مــــنـــــتــــديـــات الــــهـــيـــــر]

مشاهدة النسخة كاملة : o.O روف بي لا تمتحني من سبايبك ابتليت O.o

دلوعه بكيفي

26-09-2006, 10:06 PM

شحالكـم؟؟ شخباركم؟

عساكم طيبيـن؟

أولـى كتاباتـي بين أيديكم

::روف بي لا تمتحني من سبايبك ابتليت::

أولا :الشخصيـات المهمـة
روضة البنت الوحيدة بين أخوانها عمرها 18 سنة ثانوية عامة
راشد عمره 22 سنة يشتغل في الاتصالات
سيف عمره 14 سنة هااااااوي بليستيشن
أبو راشد(ابراهيم) أكبر أخوانه يشتغل بالتجارة صج انه شديد أحيانا بس روضة ما يردلها طلب لأنها بنته الوحيدة
أم راشد(آمنة) قلب البيت راشد ما يقصر مدلل عليها وايد و لأنه البجر يحق له
فاطمة بنت عم روضة يحبون بعض شرات الخوات خصوصا انهم هم الثنتين وحيدات
عبدالله ولد عم روضة و عمره 19 و هو أول سنة في كلية التقنية العليا مزاجــي لأبعد الحدود
أبو عبدالله(سلطان) يشتغل مع أبو راشد و عندهم شركة خاصة بهم
أم عبدالله(حمدة) ماشاءالله عليها من زينــة الحريــم مطورة نوعا ما لكــن العادات و التقاليد ما تتخلف عنهم
أمل خالة روضـــــة و هيه أقرب وحدة لها
سعود ولد أمل و عمره سنة روضـة تموت فيه
حمدان ريل خالة روضـــــة
حمد اخو بو راشد و بو عبد الله عمره 26 سنة و خاطب ميرة بنت أخت أم راشد..
عاشه(أم ابراهيم) هاذي اليدة و تاج الراس محبوبة الجميع و روضة تعتبر أعز أحفادها كلمة (منقود) ما تنمحي من قاموسها الله يعين
موزة خالـــــة فاطمـة ريلها متوفي ساكنة فـدبي مع عيالها
عيســــى ولدها البجر و عمره 21 سنة
شوق بنت موزة و عمرها 19 سنة مخلصة ثانوية و يالسـة فالبيت
مها عمرها 15 سنة و شخصيتها مختلفة عن شوق مها انسانة هاديـــة- طيبـــة - عقلها يوزن بلد
ريم بنت خالة روضـــــة بنفس سنها حبوبة و سوالفها عسل
ميــرة اخت ريم و عمرها 23 سنة تشتغــــل في وزارة الصحــة
مايد أخوهم العود عمره 27 سنــة معرس و اسم مرتــه وضحــة عنده توأم شما و شهاب عمرهم 3 سنوات
أم مايد (منى) خالة روضـــــة
شيخة اخت ابراهيم و سلطان و حمد عندها 4 عيال أكبرهم جاسم و خالد و بعدهم سعيد و الصغيرة نوف
سعيد عمره 19 سنة بعمر عبدالله شاب حلـــيو رومانســـي - حســــــاس يشتغل في الجوازات و يدرس بالكلية
عاشة:عمرها 16 تدرس فالصف الأول ثانوي بنت حبوبة كل أملها انها تخلص ثانوية و تعرس
نوف أصغر وحدة عمرها 13 سنة

دلوعه بكيفي

27-09-2006, 02:47 PM

العيون السود

27-09-2006, 07:38 PM

تسلمين يالغالية على القصة

(( تم التثبيت ))

دلوعه بكيفي

28-09-2006, 05:34 PM

سلمتي الغالية عالمرور
و هذا أول بارت

الجزء الأول
اليوم اللي تترياه روضة من زمان (( آخر يوم في امتحانات الكورس الأول)) <<< صف ثالث ثانوي (أدبي)
الصبح الساعة 7و نص
روضة : واااااابوية زايغة من الإمتحان الله يعين
فطيم : اسمع منو يرمس دام الملاقيع يقولون جذيه احنا شنقول؟
روضة : فطوم خوزي عني عينج حارة
فطيم : حليلي والله عيني أبرد من الثلج
روضة : راجعي فكيناا
الساعة 8 بالضيط دق الجرس
دخلوا البنات الصفوف
و المراقبة عليهم متأخرة فلازم حد يراقب و ماشي غير الأخصائية
الأخصائية: كل وحدة تحطي عينها فورقتها و ما أبا أسمع حس
روضة تجاهلتها لأنه لو جافت ويهها عزالله ما حلت
شوي و ياهم الإفراج يت الأبلة المراقبة طبعا الشيخة فطيم مستانسة عشان تتصفح ورقة ربيعتها عدل
روضة تجوفها و ساكتة تيمع الرمسة عشان ته********ها بعد ما يطلعون
و الله يسلمكم خلصن البنات طلعن روضة و فطيم من قاعة الإمتحان
روضة: فطوووووم يا مسودة الويه بلاها عينج زايغة أجوفج تتصددين
فطوم: لا بس أجوف أشكال البنات
روضة: أشكال البنات !! الا قولي أوراقهم
فطوم: والله يا أخت روضة طلب العلم فريضة و الإسلام دعانا لهذا الشي
روضة : أوووه فاهمة الأخت بس حطي علمج في الورقة هب علم غيرج
فطوم: الله يخليج فكينا خل أطلع بسير أجوف عبود ياني و الا
و هم يمشون
روضة :عبــــــود!! ليش وين الدريول؟
فطوم : ساير مع أبويه دبي و ما في غير الشيخ عبدالله ياخذني
روضة :لو خبرتيني جان ما تعبتيه حليله
فطوم: أي تعب غادي خيل شوراه هالأسبوع مأجز
.................................................. ........................
حصلت فطوم عبدالله و سألت روضة اذا يتها السيارة
روضة : والله ما أجوفهم ، الحيــــن بيون
فطوم: يا حرمة طوفي ويانا أحسن من الوقفة في الشمس بعدين تسودين و محد ياخذج
روضة: الخايسة أنا سودا ما عليه سيري انزين
فاطمة : أوكـــــــي يالله بااااااااااي
فطوم تركب السيارة
فاطمة :السلام عليكم و الرحمة
عبدالله : وعليج السلام و الرحمة
عبدالله :سيري ازقري روضة
فاطمة: قلتلها بس ما طاعت قالت الحين بيونها
عبدالله : عمي ساير المزرعة و ماخذ الدريول فلما درت عموه اني بخذج قالت هاتوها وياكم
فاطمة : أوكي دقيقة
سارت فاطمة لحد روضة
فاطمة : ((روضوه )) حياتي طوفي ويانا
روضوه : تستهبلين قلتلج بيوني
فاطمة : ما أستهبل بس الدريول مع عمي اركبي السيارة بلا دلع
فاطمــــة : مشينا
روضة : السلام عليكم
عبدالله : و عليكم السلام شحالج روضة؟؟
روضة الحمدلله يسرك الحال
في الدرب طول الوقت روضــة يالسة أجوف عبدالله في المنظرة و فطوم من صباح الله ترمسها و هب عاطتنها ويه
فاطمة : حووووه رويض وينج؟؟
روضة : وياج
فاطمة : هيه أنا حتى أقول انج ويايه
روضة : شو قلتي ؟
فاطمة : لا الغالية ما قلت شي
عبدالله ساير بيتهم و خطف عن بيت عمه
فاطمة : عبود انت نسيت بنوصل رويض
عبدالله : روضة بتي ويانا البيت بعدين بنوديها بيتهم
روضة : بس ما خبرت أماية
عبدالله : لا تحاتين هيه تدري
روضة :جذيه تمــــــــــــام
و طول الدرب عبدالله متوتر و خايف هب عارف شو يقوللهن
و لما وصلوا
دشت روضة و فطيم و عبدالله كان برع يرمس في التليفون و شكله مرتبك
ما حصلوا حد في البيت بس ما حطن فبالهن سارن غرفة فطيم
عاد رويض ذابحنها الفضول تبى تعرف عبدالله منو يرمس؟
و هيه أطل من الدريشة بحجة جمال الجو الخلاب
روضـة: الجو وايد حلو اليوم
فطيم : أكيد دام خلصنا كل شي حلو
روضة تعالي ندش النت
فطيم : أوكي يالله
دشت فطوم على ايميلها
و شوي الا ايميل بنك نيم (( عايف الدنيا))
روضـــــة : منو هذا ؟؟
فاطمة : هذا الله يسلمج ولد العمة
روضة : أي عمة بعد؟
فاطمة : منو بعد غير عمتج شيخة
روضة : قلوا الناس ما بغيتي الا ولدها
فاطمة : و انتي بلاج عليهم ماكلين حلال أبوج هم
روضة : لا بس ناكرين للجميل
فاطمة : بالعكس هم وايد طيبين و لو عرفتيهم زين ما بتقولين جذيه
روضة : لا أعرفهم و لا أتعرف عليهم
و بعد هالمناقشة
عايف الدنيا: مرحبا مليار
فطامي: مراحب
عايف الدنيا : شحالج بنت الخال
فطامي : يسرك حالي انت شخبارك؟؟
عايف الدنيا : والله ماشي بس الضغط مرتفع و السكر نازل و أعاني من أرق بسبة الدوام
فطامي: هههههههه عيبتني
عايف الدنيا: خلصتــــي امتحانات؟؟
فطامـي : هيه فكــــة ما بغينا
روضة ترمس فطيم : فطوم ان ما صكيتي عنه ترى بطلع من الحجرة
فطيم : روضوه عاد عن الحركات هو ما قال شي الحين
روضة :ما أداني اسمع طرواهم انتي يالسة اترمسين هذا خاطري اكسر الكمبيوتر عراسج
فطيم: روضة شو (( هذا )) بعد لا تنسين انه ولد عمتج و عمره الدم ما يستوي ماي
روضة : انزين لا تلقين محاضراتج عليه أنا طالعة أشرب ماي نشفت ريجي
فطوم : أوكيك
طلعت روضة من الغرفة
دخلت روضة المطبخ و ما أنتبهت انه حد يالس على طاولة الطعام لأنها بعيدة شوي
صبت لها ماي و توها بتطلع الا تسمع حد يناديها
عبدالله : روضــــــــة
روضة : هلا عبدالله آمــــــر
عبدالله : روضة بغيت أخبرج ........... ما قدر يكمل
روضة : بتخبرني بشوو كمل ليش سكت؟!
عبدالله : روضـــــة راشد
روضــــة : راشد!!
عبدالله : راشد في المستشفــــــــى
روضـــة حست من شكل عبدالله انه ما يسولف و كأنها الرمسة صج
روضة : (نعم) شو تقوووول راشد في المستشفـــى؟؟!!
عبدالله : هيه يا روضة هيه
روضـــة : لا كيف و متى ليش ياراشد ليش؟ و تمت تصيح
عبدالله هدي عمرج هالدموع ما راح تفيده الحين
روضـــة :شو اللي صار ؟؟!!
عبدالله : الله يعافيه كان ساير الدوام و هو مسرع فجأة طلعتله شاحنة و ما قدر يتفاداها
روضة ما قدرت تتحمل و سارت تركض على غرفة فطيم
و فطيم في هواها ما تدري عن شي
لما جافت روضة بهالحالة
ربعت صوبها عشان تعرف بلاها
من كلام روضة المتقطع مع دموعها اللي ماليه عينها
فهمت فطيم انه راشد بحالة خطر و يمكن يفقدونه
فطيــــــم بعمرها ما تقدر تنســـى راشد و عاد شريط الذكريات في لحظتها و اذكرت الضرابة اللي صارت بينهم قبل ما يتركون بعض
فطيم بطبعها حساسة و ما قدرت تيود عمرها و تمت دموعها تسيل على خدها
راحت فطيم عند عبدالله عشان تتأكد من الخبر و قبل ما تدخل الصالة طلت و جافت عبدالله موخي و محطي راسه بين يديه و بدون ما تسأله فهمت أنه السالفة صج و يمكن يموت راشد و هو زعلان منها
طلعت فطيم للحديقه وهيه تصيح لأنه هالمكان كان يذكرها براشد بشكله بضحكته بملامحه الهادية
بعد ما هدت عزمت انها لازم تسير المستشفـــــى
سارت فطوم عند عبدالله عشان يوديهم فقاللها تخبر روضة عشان تزهب و هو بيسير غرفته يبدل
فاطمة : يالله قومـــي البسي عباتج بنسير المستشفـــــى
روضــة : لا الله يخليج ما أروم أشوف أخويه و هو بين الحيا و الموت
فطيم : روضوه لا تقولين هالرمسة
عبدالله سمع رمسة روضـــة و تقرب من الباب
عبدالله استهدي بالله يا روضة و اللي كاتبنه ربي بيصير
فاطمـة:على الأقل نشوفـه
روضـة:...............................
البسن البنات و زهب عبدالله و راحوا صوب السيارة
على طول الدرب روضة صادة صوب الدريشة و الدمع ينزل لا ارادي

عبدالله هب عارف شو يسوي عشان تهدى خصوصا انها أقرب وحدة لراشد
أما فاطمة فشريط الذكريات بيفجرلها راسها من التفكير
وصلـــــوا المستشفـــى لما جافت روضة أبوها ما قدرت تيود عمرها ركضت له و تمت تصيح فحضنه
و الكــــــل يهديها و أولهم السيافي اللي دوم يضاربها بعد ما هدت شوي لفت بنظرها و ما حصلت أمها
روضة : أبويــــــــه وين أمـــايه ؟
أبو راشد : .............ساكت هب عارف شو يسوي ما يقدر يحرق قلب بنته زيادة
لفت روضة لأم عبدالله : عمووووه الله يخليج قوليلي وين أمـــــــــايه ؟
أم عبدالله : لا تخافين يا بنتي أمج لما سمعت الخبر طــــــــــــاحت علينا وهـــــــي الحين في الغرفة الثانية
روضة : انزين ودونـــــــي أبا أجوفها
أبو روضة : اصبري فديتج لما تنش بنوديج عندهــــــــــا
روضـــــــــة تساند راسها لليدار و تتنهد بالقو و فطيم يالسة و حاطة أيديها على ويهها و تصيــــح
أمــــا عبدالله هب عارف ارضه من سمـــــــــاه ساير راد ينتظر بس حد يقوله راشد بخير ما فيه شي
طلع الدكتور و يتراكضــــــــون عليه
كلهم : ها دكتـــــــــور بشر
الدكتور : اسمحلي بو راشد ما نقدرنسويله شي حاليا و هو تحت رحمـة ربك ادعووووووولـه
بانت النظرات القلقة على ويوهم و الكل حسوا انه في شي خطيــــر بيصير
بو راشد : عبدالله أبوية ود الأهل البيت
روضــة : أبويه كيف تباني أسير البيت و انتوا في المستشفــــى
أم عبدلله : قومـــي بنتي اليلسة فالمستشفى ما تسوي شي عيني من الله خير و طوفي ويايه
وصل عبدالله الأهل و رد المستشفى لعمـــه طبعا ما خبر أبوه لأنه فدبي و بييهم باجر فليش يقلقون الريال؟؟
مرت الساعات ببطء فضيــــــــــع
الساعة 10 المسا
بو راشد: عبدالله روح انته البيت وأنا بيلس فالمستشفـــــى
عبدالله: اني ما سرت ريلي على ريلك
بو راشد: اسمع الرمسة و سر البيت لا تخلي امك و البنات رواحهم
عبدالله: ما عليهم شر انشاء الله
بو راشد: لا تخليني أعصب يالله سير
عبدالله : انزين ما فخاطرك شي حاجة أمارة؟؟
بو راشد : تسلم الغالي
حب راشد راس عمه و روح البيت
طبعا كلهم ما ذاقوا طعم النوم بانتظار خبر يطمنهم

دلوعه بكيفي

28-09-2006, 05:35 PM

الجزء الثاني
الساعة 7 و نص الصبح
شل عبدالله أمه و البنات و خلوا سيف فالبيت ما يروم على غسية المستشفيات
عبدالله: السلام عليكم
بو راشد: و عليكم السلام و الرحمة
عبدالله : ها عمي الدكتور ما قالك شي
بو راشد: لا والله
عبدالله : قم خل نسير له
بو راشد: الله يستر
ساروا صوب الدكتور
بو راشد: هااا دكتور ما في تحسن فحالته؟؟
الدكتورو على ويهه ابتسامة حلوة: احنا سوينا اللي علينا و ربك ما ينسى عبادة الحمدلله اليوم الصبح فتح عينه
بوراشد الفرحة هب سايعتنه: مشكووووور يا دكتور ماقصرت
الدكتور : أفا عليك يا عمي هذا واجبنا
بوراشد: يزاك الله ألف خير الله يفرحك مثل ما فرحيتني
عبدالله: تسلم دكتووووور عالخبر الحلوو
الدكتور : الله يسلمك أخ عبدالله
طلع بو راشد مع عبدالله من عند الدكتور و راحوا عند الحريم عشان يبشرونهن
روضــــة أول ماجافت ابوها: أبوويه شو قال الدكتوووور
بو راشد: الحمدلله الحمدلله راشد بخير
روضـــــة: صج والله؟!
بو راشد: هيه يا بنتي صدق
روضة :بنسيـــــــر نبشر أمايه ما دشينا عليها عشان ما تسألنا
أم عبدالله – روضة – فاطمة سارن عند أم راشد
بوراشد - عبدالله ساروا الكوفـــي شوب يشربون لهم شـــي من صباح الله و هم على أعصابهم
بعد ما خلصوا
سار عبدالله طلب فرابتشينو حق فطيم و رويض عشــــــــــــــان يبردن على قلوبهن من الصياح اللي صاحوه
عبدالله : عمـــــــي انته سير البيت ارتاح أنا بتم ويا الأهـــــــل
بو راشد : بسير اجوف أم راشد بعدين بروح
عبدالله : أكيـــــــد يطمن على ست الحبايــــــب
سار بو راشد و يلس عبدالله يتريا الطلبية
لما دخل عبدالله المصعد حصل سعيد ولد عمته سلم عليه
و تم يسولف وياه
وصل عبدالله بالصدفة كان نفس المكان اللي رايحله سعيد
سعيد : خير عبدالله منو عندك تعبان
عبدالله : راشد ولد عمي مسوي حــــــادث
سعيد : ان شاء الله بخير؟؟
عبدالله : الحمدلله اليوم مطلعينه من العناية
سعيد : أقدر أسلـــــــم على الأهــــل من زمـــــان ما جفتهم
عبدالله : أوكـــــــي طوف ويايه
ساروا لين حجرة أم راشد عشان سعيد يسلم عــــــلى الأهل
عبدالله عند الباب : أمــــــــايه سعيد ولد عموه يبغـــــــــي يسلم عليكم
سمعت روضـــــــــة الاسم لاعت جبدها و يلست على طرف بحيث محد يشوفهـــــــا
و فطوم اذكرت انها كــــــــــانت منقعتنه على المسن من أمس
أم راشد قطعت الصمت : خله يتفضل محد غريب
روضة : استغـــــــربت من تصرف امهــا و حمدت ربها انه أبـــــــوها روح جان ما عدى السالفة على خير
دخـــل سعيد و سلم علــــــى حريم خواله و سلم على فطيم لأنه أهــــــل فطيم وايد وياهم
أم راشد : هلا والله بسعيد شحالك الغالي
سعيد يسرج الحال خالـــــــوه ماشاء الله لحد ألحين ذاكرتني
أم عبدالله : و أنتوا من يقدر ينساكم حسبي الله على الزمان بس
أم راشد : تفضل الغالي أستريح ليش واقف
سعيد : تسلميــــــن والله بس مستعيل بسير بجوف راشد و بمر على ربيعـــــي منوم هنيه
أم راشد : فيك الخير يا ولدي
و لا حظ سعيد انه في شخص يالس على الطرف و لكــن ما حاول يسأل
عبدالله : فطوووووووووم تعالي شلي عني الفرابتشينو من متى شالنه ما تقول لا تعب عمرك أخوي بشله عنك
فاطمة : حاضريــــن بو حميد أكيد حقي صج انك ما تقصر
عبدالله : خلج عاد انتي ما يهمج الا بطنج تحملي تشربينهم بثنيناتهم واحد لج وواحد لرويض
فاطمة : بفكر فأمرهـــــــا و الا أقووول غمضتني بسير أوديلهـــا
و طول الوقت سعيد ساكت و يبا يعرف منو اللي يالس لما جاف فطوم سايرة هاك الصوب عرف انه هاذي روضة بنت خاله هو ما يعرفها بس يذكرها يوم كانوا صغار
بعد ما خلص عبود رمسته
سعيد : عبدالله وين غرفة راشد بسير اجوفه
عبدالله : صبر شوي بسير وياك أدليك
عبدالله : ها عيوزنا ما تبين شي؟
أم عبدالله : عيز حيلك قول آمين
أم راشد : الله يحفظك توكل قبل لا تشب علينا أمك
عبدالله و هو يضحك : يالله انزين مع السلامة
طلع عبدالله ويا سعيد و هم فطريجهم للغرفة جافو بوعبدالله
بو عبدالله: عبوووود وينك انت أتصل بك مغلق شو السالفة أمك فيها شي أختك شي يعورها
عبدالله : هد أعصابك انت و استريح
بو عبدالله : شو استريح على الأقل اتصل خبرني أسير البيت تقولي البشكارة انكم فالمستشفى
عبدالله بصوت واطـــــــي : الله يعيني بس
بو عبدالله: يعينك على شو أرمس
عبدالله : انزين بقول الله يسلمك كل ما في الأمر انه رشود ولد عمي سوا حادث و اليوم مطلعينه من العناية و الحين ما يشكي باس احنا سايريله بتي ويانـــــا
و أخيــــــــــرا سعيد نطق و سلم
سعيد : السلام عليك خالي شحالك؟
بو عبدالله ويوايه سعيد: الحمدلله طاب حالك اسمحلي ولدي ما سلمت عليك ارقعوا قلبي
عبدالله : خل نسير نشوف رشود أحسن
راحـــــــــوا لين غرفــــــــــة راشد طبعــــــا أهو بعده تحت تأثير البنج
دش سعيد و خاله يجوفونه و يطمنون عليه بعدين اترخص سعيد و روح عنهم
الساعـة 3 و نص الظهر ياهم بو راشد عشان ياخذ أذن خروج لأم راشد و يطمن على ولده
بو راشد : السلام عليكم و الرحمة
الكل: و عليكم السلام هلا والله
روضة : هلا بو راشد الغالي اقرب اقرب
بوراشد : روضـــــــــوه غادية حرمة ماشاء الله من وين نزلت هالذرابة مرة وحدة
الكل ضحك على رمسته و أم راشد حبت تدافع عن بنتها
أم راشد : فديتها بنتي دومها ذربة طالعة على أمهـــــــــا
أبو راشد و ييلس حذاها عاد فهاذي صدقتــــــــــي
روضــــــــة: أبويه لا تاخذ راحتك وايد نحن هنا
بو راشد : روضوه فطيــــــــم جني سمعت عبود يزقر عليكم أم عبود ترى ريلج برع
أم عبدالله : زين عيل يالله مع السلامة
روحت أم عبدالله و صكت الباب وراها و رويض و فطوم لين الحين يالسات
فاطمة تشهـــــق : هيــــــــــــــــــــييييييييه
بو راشد: بسم الله بلاج؟!
فاطمة : لا بس كيف تطردني أنا فاطمة بنت سلطان تسويبي جيه
بو راشد : الله ينفد بليسج
روضــــة : أقووول متى بيرخصون أمايه ؟؟
بو راشد : اليوم بسير أخذلها اذن
روضـة:انزين ما بتخلونا نسير عند رشود
بو راشد:أنا بسير عند الدكتور و جان تبون تشوفونه سيروا عند عبدالله
روضـة:أوكـــــــي
بو راشد:عيل أخليكم مع السلامـة
روضــــــة : الله يحفظك
فاطمة : روضوه شو عندج اليوم ؟؟
روضة تساسرها : لزوووووووم التقردين حبوبة
فاطمة : ما فهمت
روضـــة بعدين بفهمج
أم راشد : شعندكن انتن؟؟
فاطمة : لا عموه و لا شي
أم راشد : أقوول سيرن أزقرن لي أم عبدالله خل ايلس وياها قبل لا يستوي بي شي
روضة : فالج طيب
روحن فطيم و روضة يزقرن أم عبدالله و سلموا على عمهم و دخلوا على راشد و كان توه ناش
روضة و فاطمة : السلام عليكم
راشد بصوت خفيف : و عليكم السلام
فطوووووووووووم صخت من جافتـه و هو طايح عالفراش و بالزور يرمس
روضة : هلا والله بأخوي الحمدلله على السلامة
راشد :اكتفى بابتسامـة
فاطمة : شحالك راشد؟
راشد : الحمدلله
فاطمة : مدام اطمنت عليكم بسير أدور عبدالله عشان أروح تامرون بشي؟؟
فاطمة : مع السلامة
راشد و رويض : الله يحفظج
طلعت فطيم دورت على عبدالله و حصلته هو و أمها كانوا بيروحون و روحت وياهم و أبوها سار يقضي باجي مشاويره
بو راشد خذ اذن الخروج لأم راشد و ساروا يطلون على ولدهم العزيز
أم راشد و هيه تصيـــح : الحمدلله على السلامة فديتك الغالي
راشد : الله يسلمج أمايه بعد ليش هالصايح و يمسح دموعها
بو راشد : تعرفها عاد أمك قلبها رهيف
روضوه: هيه الا قوووووول هذا راشد الغالي نظر عينهــا
راشد:عيل وين سيف ما أجوفه
روضـــة : خليناه فالبيت
روضة : انزين بمناسبة شفاء ولي العهد سيادة راشد باشا شرايكم نسير عوافـي
راشد : انتي دربج دومه خضر زقرت والله
بو راشد : شو زقرت شو خضر انت ما أجوف عمرك كيف غادي حتى الرمسة بالزور ترمسها
روضة : يقولولك سلمك الله عشان ترتاح جسميا لازم ترتاح نفسيا و هو يتونس يوم نسير عوافــــي خصوصا اللمة تقضي الوقت
راشد:هااا شو قلتوا؟
ام راشد : مدام انت مستانس على هالراي خلاص شورك و هداية الله
روضــــة : خوش ناس تخطط و تفكر ما يعطونها ويه
راشد : أصلا احنا بدون مخج المفكر ما نعيش
روضة : هيه هاااااي الرمسة اللي تبرد الافاد
راشد : يساسرها هب عشانج عشان اللي فبالي
روضة : ما يحتاي فاهمة عليك اخوي من متى تأيدني اصلا
بو راشد : بلاكم انتوا شعندكم؟؟
راشد : لا تشغل نفسك أبويه سوالف شباب
أم راشد : الله يهديكم ان شاء الله
بو راشد : يالله عيل احنا نترخص مع السلامة
مــــــــرن يومـــين و الزيارات على راشد ما تنقطع معارفه وايـــــــــــد ماشاء الله عليه
و بعد هاليومين رخص الدكتور راشد و اطمنوا على حالته زين ما زين و عااااااااااااااد ردة راشد للبيت تعتبر فرحة كبيرة لكل أهله
طاف اسبوع على ردة راشد و روضـــــــة طافح الكيل عندها بتموت من الملل سارت عند راشد و رمسته عن السالفة
و قالهــــــــا انه بيخبر أبوه عشان يزهبون و يخبر قوم عمه
روضة من سمعت رمسة راشد و تحبه و تحضنه و تطير على غرفتها عشان تزهب اغراضها تدري رمســة راشد معتمدة
راشد : أبويـه ياجر الأربعاء شو رايك نسير عوافي؟
روضـــــــة : أبويـــــة دخيلك بنتك روضوه الأمورة تطلب منك و تردها
أم راشد : خلاص يا بو راشد خلنا نسير على الأقل يتونسون العيال و راشد يغير جو
روضـة: لحــــــــــــول كل سالفة دخلتوا راشد عنبوه قصـي عليه مرة و قولي عشان روضـة
أم راشد : خلاص انزين عشانكم كلكم
بو راشد : روضــــــة اتصلـــــي بيت عمج و خبريهم عشان يسيرون ويانا
روضـــــة : الله وناســـــــة تسلم يا أحلــــــــى أبو في الدنيا
راشد : يلسي انتي أنا بسير اتصل كملي غداج
راشد يتصل على بيت عمه
راشد : السلام عليكم و الرحمة
فاطمة : و عليكم السلام
راشد : شحالج بنت العم؟؟
فاطمة : يسرك الحال انت شعلومك ؟
راشد : بصحة و سهالة
راشد : ان شاء الله فاضين يوم باجر
فاطمة : ما أدريبهم والله بس ما أحيد بنسير مكان
راشد : زين عيل تزهبوا لأنا عزمنا نسير الع**ة
فاطمة : ان شاء الله بخبرهم
راشد : سلمي على الأهل
فاطمة: يوصل
سكرت فاطمة و الضحكة شاقة الحلج و سايرة تربع صوب أمها و تزاعق
وحليلها أم عبدالله طاح قلبها قالت اكيد مستوي شي و تطلع من الغرفـــــــــة سريع
أم عبدالله : ها فطوم حبيبتي بلاج فيج شي ؟؟
فاطمة : لا أمايه ما أجوفيني أشقح جدامج
أم عبدالله : و ياخذ بليسج روعتيني قلت شي صــــــــــاير
فاطمــــة و بدلع : أمايه يوم الأربعاء قوم عمي بيسيرون الع**ة و بنسير وياهم
أم عبدالله : بنخبر أبوج و بنجوفه شو يقوووووول؟
فطوم: شو هالحالة ترى ان ما طلعتوني بنكبت و ان انكبت ما بكمل دراســـــة و ان ما كملت دراسة ما بشتغل و ان ما اشتغلت ما بعرس شباب هالأيام يبون بنات مريشات و اذا ما عرست بطيح بجبدكم و كل ذلك بسبب أشياء تافهه ليس لها معنـــــــى في الوجود
أم عبدالله : بل هب آدميه بالعة راديو
فاطمــــة : أصلح مذيعة
أم عبدالله : بنتي وايد تحلم
فاطمـــــة : أحلم أونة جيه ما خبرتج مرمسة ميرة المهيري تيود لي مكانها يوم بتطلع
أم عبدالله : يارهم الله تلفزيون دبـــــــي بتخربيلهم الدنيـــــــا جان قدمتـــــــــــــــي
فاطمــــــة : يا خي محد يقدر فهالبيت دوم محبطيني أنا بزهب اغراضي هب تعشموني بعدين تغيرون رايكم
أم عبدالله : عطيني مقفاج يالله انجلعـــــــــــي
فاطمـــــــة و هيه مروحة غرفتها: لا تذكرني بحبك يا غناتي لا تذكرني بماضيك الجميل في صدادك بقزرها حياتي مستحيل أحب غيرك مستحيل
فاطمـــــة : تطلع أغراضها و هيه تسحب الشنطة اللي بتحط الأغراض فيها طاح صندق صغير من الكبت و تبطل فاطمة تمسك البطاقة تقراها
هـــــاي اغلى بطاقة بالنسبــــة لفاطمـــــة كانت من راشد تدرون حركات الشبيبة كان دوم يطرشلها بطايق و يعبرلها عن حزنه و فرحه
فاطمــــة تسترجع اليوم المشؤوم << ما قلتلكم بخبركم

::يا ترى فطيم شو سالفتها؟؟::

دلوعه بكيفي

28-09-2006, 05:37 PM

الجزء الثالث

ذاك اليوم خال فطامي و عياله يايين و هاي عادتهم كل صيف فاطمة تحب السوالف و دايما هيه اللي تربش المكان هيه كانت تيلس و يا عيال خالها عادي خصوصا انهم متربيـــــــــن وياهم و أكثر شي مع فهد
حزة الظهـــــر الكل نــــــش يتغــــــــــــــدى و خلصـــــت فطامــي الغدى و لحقها فهد كان معجب بفطامي نوعا ما
فاطمـــة: فهـــــــــــود حاولت أفتح السيدي اللي عطيتني اياه بس ما طاع
فهد: وين الكمبيوتر ؟؟
فاطمـة: في المكتب قم خل نحاول فيه
فهد: سريــــــــــنا
فهاذيج الحزة كــــــان راشـــــد ياي يسلم على عمه لأنه بيسير بوظبــــــي عنده شغل
دش البيت ما حصل حد في الصالـــــــة قال أكيد في غرفة الطعام يتغدون فطريجه و هو ساير غرفة الطعام حصل باب المكتب مفتوح و فطامــــي تضحك لكن في صوت غريب وياها
كانت فاطمة يالسة على الكمبيوتر و حذاها فهد و يسمعــــــون الأغنية اللي في السيدي
حاول راشد يوقف صوب الباب بحيث محد يشوفــــه
فاطمة: فهود أثري ذوقك حلو زقرت الأغنية والله
فهــــد : الحلـــو للحلو << و نظراته كانت جد غريبه
فاطمــــة : تسلم والله يا ولد الخال
فهالحظة فاجأهم راشد بدخــــــــوله لأنه ما يقدر يحتمل انه فهد يغلبه و ياخذ قلب فاطمة منه
راشد: السلام عليكم و الرحمة << يطالع فطيم بنظرات غضب
فطامي : و عليكم السلام هلا راشد شحالك؟
راشد :بصحــــــة و سلامـــة
راشد و بنظرة ازدراء لفهد : مرحبا فهد شحالك؟
فهد: ما نشكـــــي باس
راشـــــد:بسير بسلم على عمــــــي قبل لا أروح
فاطمــة:انزيـــــــــن ليش مستعيل
راشد:وراية درب ما فيه أوصــل تعبان
فاطمة :ليش وين بتسيــــــر؟
راشد:ليش يهمج؟ و راح عنها غرفة الطعام
راشد:السلام عليكم و الرحمــــــــة و يحب عمه على راسه ويوايه خال عبدالله
عبدالله :هلا رشود ما أروم عاد أهد الغدى الزين و أسلم عليك
راشد: أقـــــول كمل أكلك بطيـــــــني
عبدالله: الغدى زقرت تعال اقرب
راشد:تسلم بو حميد ما أشتهـي
راشد و ينش عنهم : يالله تامرون بشي
بو عبدالله :انزين تقهوى عدنا
راشد:ما تقصر عمي خيرك سابق لكن ورايه درب
عبدالله يرز ويهه: ليش بو الشباب وين ساير؟
راشـــــــــد: ساير بو ظبــــــي
بو عبدالله : الله يحفظك انشاء الله
عبدالله :رشــــــود ان ييت و مايبتلي شي وياك بزوالك
راشــــد :نشاد عنك أنا بس ماعليه بيبلك نعال تكشخ فيه تعرف عاد اجازة الناس فاضية ما وراها غير الدوارة في السناتر
عبدالله يساسر راشد : انزين اسكت فضحتنا شيبتنا بييلس يستفسر الحين
بو عبدالله : شاب راسك يا عبود أنا شيبة؟؟!
عبدالله فـاج عينه : ماشاء الله عليك اللي تباه بتسمعــــه
راشد: يالله عيل بترخص فمان الله
راشد طلـــــــع عنهم و لما وصــــل صوب السيارة جاف فطيــــم ميلسة في الحديقة
راشـــــد : هاا فطيـــــم أجوف يالســـــة روحج ويــــــــــن..............؟؟
فاطمة : شو تقصد يعنــــــي
راشــــــد : لا سلامتــج الشيخـــة
فاطمة : راشد عاااد لا تستوي سخيف فهد ولد خالي مثل ما انت ولد عمـــــي
راشد: ولد خالــــــــج بس
فاطمـــــــة: أكيــــــــــد
راشد : بس رمسته غيــــــــر عن اللي تقولينـــــه شكلـــــه يحبج الأخــــو
فجأة فهــــــــد ياي و سمعهم
فهد : هيه ان شاء الله و بخطبها بعد
فاطمــــة هب قادرة ترمس لسانها وقف عن القـــــول
راشد : الله يهنيج يا .... بنت عمـــي
فاطمــــــة روحــــت عنهم و هيه دموعـــــــــها على خدها <<الحمدلله محد في الصالـــــــة
طلــــع راشد من بيت عمه و فهــــد مستانس كان يحب يكسـر خشم راشد لأنه يحسه أحسن عنه فكل شي
راشد فالسيارة و يضرب السكـــــــان بيده : ما بغـــــي غير فطيم
.*.*.*.*.*.*.*.*.*.*.*.*.*.*.*.*.*
فاطمـــــة في الغرفــــة تصيح : والله لتجوف يا فهــــــود أكيد الحين مستانس عاللي سواه
أم عبدالله أدق الباب على بنتها : فاطمــة افتحـــي الباب تعالي انزلي تحت
فاطمــــــة تربع عالحمام تغسل ويها : ان شاء الله ألحين نازلة وراج
بعــــــــــد 5 دقايق نزلت فطيـم الصالــــــــــة يلست فاطمة حذا عبدالله و تجوف فهـــــد بنظرات تكسر الصخــر شوي و بتنش تذبحـــــه و هو هب مسولها سالفة أهم شــي يحطم راشد
و من هااااااااك اليوم فاطمــــة انقطعت علاقتها براشـــــــــد و فهد دوم تعامله بجفــــــــــا
فاطمــــــة : آي قلبـــــــي الله يخسهـــــا من سالفة
عبدالله يدش : بلاه قلبج ان شاء الله؟؟
فاطمـــــــة : لا مــــــا شي خبرتك أمايه ؟
عبدالله : عن؟؟
فاطمــــــة : بنسيــــــــر الع**ـــة
عبدالله : والله ونــــــاسة تولهــــــت على اللمـــة الحلــــــوة
فاطمــــــة: هذا اذا وافــــــق الشيخ بو عبدالله
عبدالله : ماعليــــــــج الشويبة يستانسون على هالسوالف ما بيقول لا
فاطمــــة زين عيــــــل ممكن تطلع برع عشان أزهب اغـــراضـــــــي
عبدالله : أيا السودا اللي يقولون ميت عليج بطلع بكرامتي أحسن
فاطمـــــــة : فارج يالله
عبدالله و يصك الباب: مردودة ان شاء الله
من الصـــــــــــوب الثانــــي
روضــــــــة مستانســـــــــــــة الدنيا هب سايعتنها من الونــــــــاســـة و أول مــــرة تقضـــــــي يومها مثل الخلق
و راشد كان يتفكر لو انه مات و ترك أهله مات و فقد فطيم أغلى ما عنده شو بيستوي شو اللي بيصير؟
و عزم من هاللحظة انه يحاول يرجع أيام فطيم بما انه افتك من فهد اللي ما رمس بخطبة فطيم
يوم الأربعاء المرتقب
راشـــــد و روضــــــة ناشين من صباح الله روضـــــة تعابل الأغراض مع أمهـــــا << من وين طالعة الشمس؟؟
و راشد يحطـــــــــي القشار فالسيارة و أم راشـــــــــد تتحرطـــــــم
أم راشــــد : راشـــــد شوي شوي توك طالع من المستشفـــــــى بزقــــر البشكــــــــار يعابل عنك
راشـــد: لالا أمايه عادي ما في شي ثجيــــــــل
أم راشد: وش عنه مستعيليـــــــــــــــن انزين
راشـــــد : هب مستعيليــــــــن بس احنا بنسير قبلكم بنجيك على المكـــــــان و انتوا قوم عمـــــي بيشلونكم وياهم
روضـــــة من سمعت طاري عمها ربعت صوبهــــــم : رشود ألحيــــــــــن بنسير؟ << تستهبل البنت
راشد و يقلدها : لا ارتــــــــاحي انتي بعدج بتسيرين ويا قوم عمــــــي
روضـــــــة الضحكــــــة شاقة الحلــــــــج
خلص راشد شغلــــــه و سار الع**ــــــة ويا أبوه
علــــــى الساعـــة 1 رن التليفــــــــون
فاطمـــــة : الوووو السلام عليكم
روضــــــة : و عليكم السلام هااا فطـــــــوم شو هالاحترام النازل
فاطمة : جب الله ياخذ بليسج قلت يمكن عمووه تشلـــه و الا شـــي
روضـــــة : لا ارتاحي فديتج عمووه في المطبخ و (شي) روح ويا أبويـــه
فاطمـة : حشــــــــى ينية ما يطوفج شـــــي
روضــــــة : عشوووون عيل أنا روضة بنت ابراهيــــم
فاطمــــة انزين روضــــة خانم سيري انقفضــــــي عشان نمر عليكـــــم
روضــــة : طيارة الله يخليج يالله باااااااااااااي
فاطمة : باااااااااااااايات
روضـــــة تزاعـق : أمايه يالله خلصـــــــي بيمرون علينــــــا الحـــــين
أم راشـــــــد: انزين جوفــــــــي السيافي خلص
روضـــــة : ليش ما سار ويا ابويـــــــــه؟؟
أم راشد : لا ما ســـــــــار
روضــــة تصعد الطابق الثاني : سيفووووووووووووووووه وينك؟؟
و أخونا ساكت مندمج ويا الـــ Play Station
روضـــــة ما خلت غرفـــــة الا دورت فيهــــــا جربت من غرفــــــــة راشد تسمع حشــــــرة دخلت الا أجوف الحبيب
يالس يلعب بدون ما يكلف على عمره و يبدل ثيابه عالأقل
روضـــــه: سيفوووووووه قم البس سريع بنروح
سيف : وين ؟؟
روضة : تستهبل ؟؟
سيف : لا
روضــــة: يالله قوم عمي بيمرون علينا بنسير الع**ة
سيف : ما با أسيـــــر
روضــــة: ان ما قمــــــت والله اتصل لراشد و أخبره عليك
السالفــــــــة فيها راشد لا يحوشك تبدل أحسلك
سيف : انزين الحين ساير
روضــة: يهال ما ايون الا بالعين الحمرا
نزلـــــــت روضـــة و هيه لابسـة عباتها و شاله الشال وياها لأنه الجــــو بارد و هيه ما تتحمل
شوي و تسمــــــــع صوت هرن
روضــــــة : أمايه يالله , سيفووووه خلّص؟؟
طلعـت روضـــــة عنهم و ركبت السيارة
روضة : السلام عليكم و الرحمــــــة
الكل : و عليكم السلام
روضـــــة : شحالك عمـــي شحالج عموه ؟
بو عبدالله : بصحــــة و سلامــة
أم عبدالله : الا وين أمج ؟
روضـــــة : الحيـــــــن ياية تتريا سيفوه يخلص مستوي شيخ
بو راشد : الشيخ سيف يانا يا حيه
روضـــــة: عيل وين فطيــــــم؟
فاطمة تنقزلها من ورا : هلا رويـــــــض
روضـة تزعق : أميـــــــــــــــــــه حشـــى من وين طالعة انتي؟؟
فاطمـــة : من بيت أمي و أبويه
شوي و أم راشــــــــــد تدخل السيارة و تسلـــم
فاطمــــــة : هلا عمـــــــوه شحالج؟؟
أم راشد: الحمدلله بخير انتي شخبارج؟؟
فاطمــــة : مدام انتوا ويانا اكيـــــد بخير
روضــة تساسرها : هب لله
فاطمــــة: صخــــي انتــي مخربة الجماعات
روضـــــــــة تساسرها: أقــــول عبود جيه ما يا؟؟
فاطمــــة تحرق أعصابها : جيه ما تدرين؟؟
روضة : شووو ؟؟ قولي
فاطمـة : وحليله يغمـــــض كان فخاطره ايي ويانا لكن دقته حمــــــى حتى باب الغرفة ما يروم يوصله
روضــــة حليلها سكتت حضهـــــا أقشـــــر بالقو : الله يعافيه ان شاء الله
فاطمة تضحك : صــــــــــادووه قصيت عليج و انتي مصدقة تغمضيــــــــــن
روضـــة: وااااي انتـــــــي مالت على هالويه
سيف : اندوك انته تقلد هنووووووي
روضـة: جب انته محد طلب تعليقك
سيف : أنا الشيخ محد يقولي جب
روضــة: هب علي انا انزين ترى والله أراويك شي ما يسرك
فاطمــة: عاشت روضـــــــوه يالله قومــــي صفعيه
سيف : عمــــــــيه ترى والله ما أخلي فيهن عظم صااحـــــي
بو عبدالله : طنشهن هالبنات محد يعطيهـــــن ويه اسألنـــــــــي أنا
فاطمـــــة : أمايه جوفــــــي ريلج شو يقوووول
أم عبدالله : ويديه شو ريلج هاذي بعد اصطلبي أجوف
فاطمــة : بغيناها طرب صارت نشب
بو عبدالله : ما باجلنا شي و بنوصل يالله كل واحد يحطي لسانه فحلجه و يسكت والا بردكم البيت
عم السكــــــــــــــــون في السيارة لا حـــــس و لا نفس

دلوعه بكيفي

28-09-2006, 05:37 PM

التكملة..

وصلواا الحبايب الع********ة و فطووووووم شاقة الحلــــــــــج و روضوه ضايعة في الطوشة
نزلت الشيخـــة فاطمـة من السيارة و تنزل القشار وراها << اسم الله عليها حرمة بيت و روضــــة مبوزة ما جافت أخينـــــا
يلسوا الحريـــــــم على طرف و المكـــــــان ترتـــــــــوب بس باجـــــــي خيمـــــــة ما نصبــــــوها
بـــــو راشد: أم راشـــــد يالله حطـــــوا الغدى ترانا يواعــى
أم راشد : ان شاء الله
الســــاعة 2 شطبـــوا على الأكـل و نظفوا المكان و كل شــــــي ترتوب الحين
عقب الغدى
بو راشد: روضوه فطوم يالله قوموا نصبوا ويانا الخيمـــــة
روضـــة : أنا ما أروم تعبانة شكــلي بزجم
بو راشد : يالله يا هالبنت دومها الا ما تروم
فاطمــــة : حليلها والله ما تجوفها مدثرة بالشاااااال تغمــض
روضــــــة : صخــــي انتي تعرفين اني استبرد سريــــــــع
فاطمــــة : يالله عمـــــــي أنا بسير وياك ما علينا منها
تمت روضـــــــــة ساكته ويهها محمر من البرد أما فاطمـــة سارت ويا عمها و تشققت لما عرفت انه راشد بينصب الخيمـــة وياهم
بوراشد : فاطمــــة يودي هالعمود بالقو عشان ما يطيح
فاطمـــة : ان شاء الله عمـــــي
بو راشد : يالله طوفوا خل نثبت العمدان الداخلية
فاطمــــة ميـــــــودة العمووووود شوي و بيطيح عنها يوده راشد عنهـــــا تبــــى تخوز ايدها هب عارفـــــة تمت تسحب ايدها شوي شوي عشان العموووود ما يطيح و راشد و لا جنه مسوي شي
الســــاعـة 3و ربع خلصوامن نصب الخيمة و ترتيبها
بو راشد : خلاص هاااااااااااي بسميها خيمـــــــة فطيم و راشد
فاطمـــة أجوف راشد من طرف عينهــــــــا و على ويهها ابتسامة عريــــضة يعنــــــي فيه أمـــــــل
سيف : لا والله ليش و أنــــــــــا ؟؟
بو راشد : حد قالك ما تشتغل ويانا
سيف : هوووووهوو لا ترمسونـــــــي زعلان
فاطمــــة: من متـــــــى الرياييل يزعلــــــون ؟؟ و روحت عنهم
روضـــة ياية صوبهـــــم و الويه معتفــــــس
راشد : بلاج رويــــــض ؟؟
روضـــــة : لالا ما شــــــــــــي عيل وين فطــــــيم؟؟
راشد : سارت صوب المنامـــــــــــــة
المنامـــــــة كانت جريب من باب الع********ة و روضـــــــة تمشـــــــــي و هيه موخية هب رايمــــة تشل راسها شوي الا هيه مندعمـــــــة بعبدالله و موووووووول ماشي توازن سريع طاحــــــت
عبدالله : روضــــــــة بلاج روضــــة شي يعورج ؟؟
روضـــــة تفتح عينها شوي شوي و تحاول تقوم : لا ما يعورنــــــي شي
عبدالله : كيف ما يعورج شي جوفـــــــي ويهج
فاطمــــــة مرت من صوبهـــم و جافتهم
فاطمــــــة : روضـــوه بلاج .؟
عبدالله : ما أدري بها أنا ياي و دعمت فيني و طاحت على الأرض
فاطمــــة تتهيس يبهتها ضووووو حارة : روضوه قومـــــــي لازم نسير المستشفـــــــــــى
روضـــــــة : لالا مابى ما فيني شي قلتلج
فاطمــــة : كيف مافيج شي و انتي هب رايمـــــة تنشيــــــــن
قام عبدالله عنهم و سار يسلم على الرياييل عشان فاطمة تقنع روضــة
عبدالله : يا مرحبا الساع هلا بالعم
بو راشد : هلا فيك شحالك بو حميد ؟؟
عبدالله : يسرك الحال طال عمرك
راشد : هااااا عبود وينك ليش ياي متأخر
عبدالله : ياخــــــــي سهـــران و لين ألحين فيني نوم
فاطــــمة تزعق : عبدالله يالله خل نسير
عبدالله : يالله أنا أستأذن بسير أقوووول حق قوم أمايه بخذ البنات بمشيهـــــن
راشد : يالله ماشي سيرة
عبدالله : فطووووووووووم معورة راســــــي تبا تحوط
راشد : زيــــــــن عيل أذنك معاك
عبدالله : من زمان اذني معاي الا خشمـــــي ناسنه عندكم
راشد: ينكـــــــــــت بعد
عبدالله يلبس نعاله و يسير صوب السيارة : أمايــــــه تراني ماخذ البنات ويايه
أم عبدالله : انزين تعال سلم
عبدالله : بعديـــــــــــــن مستعيل

العيون السود

29-09-2006, 01:51 AM

تسلمين يالغالية على البارت
ونتريااا التكمله

بدوية مرتبشة

04-10-2006, 05:00 PM

تسلمييييييييييين عالقصة
بس وين التكملة ولا خلاص ما بتكملينها ^ ــ ^

@~راعـ الفتك ـي~@

11-10-2006, 08:49 PM

السلام عليكم ورحمة الله وبركاته
~*¤ô§ô¤*~«®°·.¸.•°°·.¸¸.•°°·.¸.•°®»شكرا أختي على القصة الحلوه أنشاء الله موفقه مع التحيات أختج @ ~راعيه الفتك~@«®°·.¸.•°°·.¸¸.•°°·.¸.•°®»~*¤ô§ô¤*~

@ الموت @

22-10-2006, 02:20 PM

يسلموووووووووووووووووووووووووووووووو

مالك الحزين

04-11-2006, 12:51 PM

تسلمين أختيه على القصه

ولا تحرمينا من يديدج

أخووووووووج

مالك الحزين